Эронда ҳибс: Исроил учувчиси махсус кучлар қўлида!

Эрон ва Исроил ўртасидаги зиддият янада кескинлашмоқда. Эрон давлат ахборот агентлиги — IRNA хабарига кўра, мамлакат махсус кучлари уриб туширилган учинчи Исроил ҳарбий самолётининг учувчисини қўлга олган. Ҳозирча мазкур хабар расмий манбалар томонидан тасдиқланмаган бўлса-да, вазият жиддийлик касб этмоқда.

IRNA маълумотларига кўра, қўлга олинган учувчи Эрон ҳудудига ноқонуний равишда кирган, кейинроқ у уриб туширилган самолётдан қутулиб қолган ҳолда қочишга уринган. Махсус хизматлар уни ҳибсга олиш жараёнида юқори даражадаги махфий операцияни амалга оширгани таъкидланмоқда.

Шунингдек, Эрон полицияси мамлакатда хавфсизлик чораларини кескин оширган. Барча йўлларда ҳаракатланаётган юк машиналари ва пикаплар тўхтатилиб, ҳужжатлари синақдан ўтказилмоқда. Ҳужжатсиз ҳаракатланаётган транспорт воситалари ушланиб, махсус текширувга юборилмоқда.

Бундан ташқари, қўшни Ироқ осмони ҳам вақтинча ёпилгани маълум қилинди. Ҳукумат 19:00 гача барча ҳаво қатновларини тўхтатган, фақат битта аэропорт фаолият юритишига рухсат берилган.

Мутахассислар бу ҳаракатларни хавфсизлик бўйича олдиндан кўрилган чоралар сифатида баҳоламоқда. Халқаро таҳлилчилар эса Эрон-Исроил ўртасидаги эҳтимолий кескинлик янги босқичга ўтиши мумкинлигини таъкидлашмоқда.

Zamin.uz таҳририяти вазиятни кузатишда давом этади ва расмий баёнотлар эълон қилиниши билан сизга етказади.