АҚШ Украинага эмас, Яқин Шарққа устувор аҳамият бермоқдами?

АҚШ мудофаа вазири Питер Ҳегсет сўнгги берган баёноти орқали халқаро сиёсий майдонда кескин муҳокамаларга сабаб бўлди. Fox телеканалига берган интервьюсида у Вашингтон Украина учун мўлжалланган дронларга қарши мудофаа тизимларини Яқин Шарқдаги америкалик ҳарбийлар ихтиёрига ўтказганини тасдиқлади.

«Конгрессда бунга оид савол берилди ва мен очиқчасига жавоб бердим: “Ҳа, биз бу тизимларни кўчирдик”», — деди Ҳегсет ўз сўзларида. Унинг таъкидлашича, АҚШ замонавий ҳарбий таҳдидларга қарши тайёр туриш учун ўз мудофаа стратегиясини тубдан ўзгартирмоқда.

Пентагон раҳбари сўзларига кўра, янги даврда урушлар кўриниши мутлақо бошқача тус олмоқда. «Кичик дронлар, жумладан, арзон ва қулай тайёрланадиган тизимлар ҳам жуда катта хавф келтириши мумкин. Лекин бизнинг мамлакат бу таҳдидга тайёр — бизда билим, технология ва энг муҳими, тажрибали ҳарбийлар бор», — дея таъкидлади у.

The Wall Street Journal нашри маълум қилишича, 5 июн куни АҚШ Украинанинг мудофаасини мустаҳкамлаш учун тайёрланган махсус ракета тизимларини яширин равишда Яқин Шарқдаги ҳарбий базаларига йўналтирган. Ушбу қарор Питер Ҳегсет томонидан Конгрессга расман маълум қилинган, аммо ортиқча шовқин ва матбуотсиз.

Эътиборлиси, ордан кўп ўтмай, 8 июн куни Украина президенти Владимир Зеленский жаҳон ҳамжамиятини ҳушёрликка чақирди. Унинг сўзларига қараганда, АҚШ раҳбарияти аввал Украинага берилишини ваъда қилган 20 минг дона дронларга қарши ракетани Яқин Шарққа юборган.

Зеленский бу қарордан норозилик билдирмаган бўлса-да, дипломатик тарзда хавотирини баён этди. Унинг таъкидлашича, бу жаҳон сиёсий картасида Украина устуворлиги сўнмоқда, деган фикрни уйғотиши мумкин.

Бу орқали АҚШнинг стратегик устувор йўналиши Яқин Шарқ томон бурилаётгани, Украина муаммоси эса унча муҳим бўлмаган майдонга кўчирилаётганини англатиши мумкин. Сиёсий таҳлилчилар буни Жаҳон сиёсий вазиятида катта ўзгаришлар бошланишининг белгиси сифатида баҳоламоқда.