Исроил-Эрон можароси: қўшни давлатлар хавотирга тушди

Яқин Шарқдаги сиёсий вазият яна бир бор жиддий таҳликалар остонасига келиб турибди. Bloomberg агентлиги тарқатган маълумотларга кўра, Эронга қўшни бўлган бир қатор давлатлар Теҳроннинг Исроил билан эҳтимолий тўқнашувидан жиддий хавотир билдирмоқда.

Айни пайтда, сўнгги икки йил ичида Эрон билан дипломатик алоқаларни тиклаган Форс кўрфази давлатлари минтақа бўйича юзага келиши мумкин бўлган ҳарбий кескинликдан хавфсирамоқда. Манбаларнинг таъкидлашича, мазкур давлатлар Исроилнинг кескин ва провокацион ҳаракатларидан ташвишга тушмоқда ҳамда ўзлари бу зиддиятга тортилишини истамайди.

Мақолада таъкидланишича, Эрон ҳам ўз қўшниларининг хавфсизлик масалаларида бефарқ эмаслигини ҳис қилиб турибди. Шу боис, улар орқали АҚШ раҳбарияти, хусусан, Президент Дональд Трамп билан маълум бир деэскалация ҳаракатларини амалга оширишга уринаяпти.

Бундан ташқари, Форс кўрфазидаги баъзи давлатлар мансабдорлари Эроннинг ядровий дастури юзасидан хавотир билдириб, Исроил томонидан кўрилаётган таҳдидларга қарши чораларни маъқуллаган. Улар, айниқса, ушбу дастурнинг амалга ошиши минтақавий барқарорликка жиддий хатар солишини таъкидлашган.

Умуман олганда, минтақадаги вазият янада кескинлашиши эҳтимоли юқори. Эрон-Исроил муносабатларидаги ҳар қандай ўзгариш бутун Яқин Шарқ геосиёсий мувозанатига таъсир кўрсатиши мумкин. Шу сабабли, қўшни давлатлар нафақат дипломатик, балки хавфсизлик нуқтаи назаридан ҳам жуда эҳтиёткор ҳаракат қилмоқда. «Замин»ни Telegram’да ўқинг!