Трамп ва Зеленский учрашуви: муҳокамалар, тортишувлар ва умидлар

АҚШ президенти Доналд Трамп ва Украина етакчиси Володимир Зеленский Канадада ўтаётган “Катта еттилик” саммити доирасида навбатдаги муҳим учрашувни ўтказиши кутилмоқда. Бу ҳақда расман Оқ уй маълум қилди. Гап шундаки, уларнинг аввалги мулоқотлари ҳамиша сиёсий фон ва тортишувлар билан бирга кечган.

Саммит 16 июнь куни бошланган бўлиб, 17 июнгача давом этади. Зеленский мазкур нуфузли йиғилишда меҳмон сифатида иштирок этади ва у сешанба куни Канадага етиб келиши режалаштирилган. Зеленскийнинг иштироки катта аҳамият касб этади, чунки бу сафар АҚШ билан Украина муносабатларида янги саҳифа очилиши мумкин.

Икки давлат раҳбарлари 2025 йил бошидан бери иккинчи марта кўришмоқда. Биринчи учрашув 28 февралда Оқ уйда бўлиб ўтган, аммо келишув ўрнига тортишув билан тугаган эди. Зеленский АҚШда ер ости бойликларини ўзлаштиришга оид келишувни имзолаш учун келган, лекин журналистлар олдидаги оғзаки баҳс туфайли у Вашингтонни ташлаб кетган. Шу воқеадан сўнг, Трамп Украинага ҳарбий ва разведка ёрдамини қисқа муддатга тўхтатиб қўйганди.

26 апрелдаги иккинчи учрашув эса Ватиканда, Рим папаси Францискнинг дафн маросими пайтида бўлиб ўтди. Бу мулоқот анча конструктив руҳда кечгани қайд этилган. ОАВнинг ёзишича, Зеленский Трампни Россияга нисбатан қатъийроқ позиция эгаллашга ишонтирган ва Трампнинг сўнгги чиқишларида Кремл танқид қилина бошланган.

Шу билан бирга, Трамп Оқ уйга қайтганидан буён Россия президенти Владимир Путин билан юзма-юз учрашмаган. Улар беш марта телефон орқали мулоқот қилган, сўнггиси 14 июн куни бўлиб ўтган. Бу суҳбатда эса асосий мавзулардан бири Украина эмас, Исроил ва Эрон ўртасидаги ҳозирги тўқнашув бўлган.

Зеленский эса сўнгги ойларда АҚШ ва Россия ўртасидаги “илиқлашув”дан жиддий хавотир билдирмоқда. Украина раҳбари 12 июн куни АҚШ Давлат департаментининг Россия куни муносабати билан йўллаган табригига кескин муносабат билдириб, бундай қадамни “нохуш иш” деб атади. Унга кўра, Украина мустақиллигига таҳдид солаётган давлатни АҚШ каби иттифоқчи табриклаши – қабул қилиб бўлмас ҳолатдир.

14 июн куни Newsmax телеканалига берган интервюсида эса Зеленский Москва-Вашингтон мулоқотини “жуда илиқ суҳбат” деб атади. Унинг фикрича, “Путин урушни тугатиш ниятида эмас ва охир-оқибат Трампни алдаши мумкин”.

Канададаги навбатдаги Трамп – Зеленский учрашуви қандай натижалар беради, АҚШнинг Украинага ёрдами қайта тикланадими ёки Киев учун янги босимлар даври бошланадими – бу саволлар яқин кунларда жавобини топади. Бир нарса аниқ: дунё бу учрашувни катта қизиқиш ва ҳаяжон билан кузатмоқда. «Замин»ни Telegram’да ўқинг!