17 июнга ўтар кечаси Киев яна бир бор катта фожеага гувоҳ бўлди — Россия томонидан йўлланган учувчисиз учиш аппаратлари натижасида Украина пойтахтига йирик зарба берилди. Украина ички ишлар вазири Игор Клименконинг сўзларига кўра, мазкур ҳужум натижасида камида 14 киши ҳалок бўлган, яна 44 киши тан жароҳати олган. Қурбонлар сони ошиши эҳтимоли ҳали ҳам мавжуд.
Вазиятга ойдинлик киритган вазирнинг маълум қилишича, дронлар Киевнинг турли ҳудудларида жами 27 нуқтага зарба берган. Зарбага учраган иншоотлар орасида турар жой бинолари, таълим муассасалари ва муҳим инфратузилма объектлари ҳам бор.
Днипро туманида Shahed туридаги учувчисиз учоқнинг парчалари турар жой деворига урилиб, муҳандислик структураларига зиён етказган. Баxтга қарши, ёнғин содир бўлмаган ва бу ҳудудда жабрланувчилар қайд этилмади.
Киев шаҳар мэри Виталий Кличко ҳужум оқибатида 40 дан ортиқ хонадон буткул вайрон бўлганини маълум қилди. Унинг таъкидлашича, вайроналар остида тирик қолганлар бўлиши мумкин ва қурбонлар сони ортиши эҳтимолдан холи эмас. Соломенский туманида, ҳужум пайтида шифокорлар ёрдам кўрсатаётган бинога яқин ерда портлаш содир бўлиб, АҚШ фуқароси — 62 ёшли эркак ҳалок бўлгани тасдиқланди.
Дарницкий ва Святошинский туманларидаги портлашлардан сўнг ёнғинлар келиб чиққан. Электр тармоқларига етказилган зарар туфайли, айрим туманларда электр энергияси вақтинча узилган. Мутасадди хизматлар тезкор равишда аварияларни бартараф этиш ишларини олиб бормоқда.
Сўнгги ҳафталарда Киев ва бошқа шаҳарларга йўналтирилаётган дрон ҳужумлари тобора кучайиб бораётгани, фуқароларнинг хавфсизлигини таъминлаш масаласи янада долзарб аҳамият касб этиб бораётганини кўрсатмоқда. Украина расмийлари халқаро ҳамжамиятни бу фожеаларга бефарқ қолмасликка чақирмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
