Starship синовида яна портлаш: SpaceX ва Илон Маск Марсга йўлда қийин синовлардан ўтмоқда

SpaceX компанияси томонидан яратилган ва инсониятни Марсга етказиш орзусини олиб юрган Starship космик кемаси навбатдаги синов парвози пайтида яна портлади. 18 июнь куни Техас штатидаги Starbase космодромида кечаётган ушбу воқеа АҚШ ва бутун дунёда катта қизиқиш уйғотди.

SpaceX’нинг расмий баёнотида айтилишича, синовнинг статик олов босқичида — двигателлар ишга туширилганда, ракетанинг биринчи поғонасида портлаш рўй берган. Кучли портлаш оқибатида иккинчи поғонада ёқилғи сизиб чиқиши кузатилган ва натижада бутун тизим бошқарувдан чиққан. Таъкидлаш жоиз, ушбу статик синовда ракета учирилмайди, у майдонда маҳкамланган ҳолда туриб, фақат двигателлар текширилади.

SpaceX ва маҳаллий расмийлар ҳодисадан кейин полигон ва унинг атрофини хавфсизлаштириш бўйича тезкор чоралар кўрди. Жамоатчиликка ва журналистларга ҳеч қандай хавф йўқлиги маълум қилинди. Аммо барчага ҳудудга яқинлашмаслик қатъий тавсия этилди.

Илон Маск томонидан бошқарилаётган SpaceX ширкати бугунгача Starship’ни ривожлантириш учун миллиардлаб доллар сарфлади. Ушбу ракетанинг асосий мақсади — инсонларни Марсга, шунингдек, 50 йиллик танаффусдан сўнг Ойга қайтаришдир. НАСА билан ҳамкорликда амалга оширилаётган миссия доирасида бу лойиҳа илмий-техник тараққиётда янги саҳифа очиши кутилмоқда.

Бироқ йўлда муаммолар кўп. Starship синовларида портлашлар, техник носозликлар тез-тез кузатиляпти. Хусусан, бу учоқ еттинчи, саккизинчи ва тўққизинчи синовларда ҳам турли аварияларга учраганди. Портлашлар сабаб АҚШ жануби ва ҳатто Кариб денгизи ҳудудларигача ракета бўлаклари тушиб, аҳоли орасида ташвиш уйғотган.

Шу билан бирга, ушбу муаммоларга қарамай, SpaceX ўз лойиҳасидан қайтмоқчи эмас. Маск ва унинг жамоаси синовлар орқали ҳар бир муваффақиятсизликдан сабоқ олмоқда. Марсга инсон қадам босиши учун керак бўладиган технология ва ишонч — айнан шу муваффақиятсиз синовлардан келиб чиқяпти.

SpaceX’нинг олий мақсади — инсоният тарихида янги саҳифа очиш. Бу йўлдаги ҳар бир портлаш, ҳар бир синдикат, илғор технологиялар сари ташланган дадил қадам ҳисобланади.

Яқин ҳафтанинг ўзида Starship'нинг навбатдаги синови эълон қилиниши кутилмоқда. Инсоният эса ҳали олдинда кўплаб техник муаммоларни енгиб ўтишига ишонмоқда. «Замин»ни Telegram’да ўқинг!