Путин: “Россия – ишончсиз иттифоқчи” деган фикрлар – фитна тарқатиш

Санкт-Петербург халқаро иқтисодий форумида Россия президенти Владимир Путин дунё жамоатчилиги диққатини яна бир бор ўз фикрлари билан ўзига қаратди. Унга «Россия Эронни қўллаб-қувватламади, шунинг учун ишончсиз иттифоқчи» дея танқид қилаётганлар ҳақида савол берилди.

Путин бу каби қарашлар ва гап-сўзларни тарқатаётганларни кескин қоралади ва уларни «фитначилар» деб атади. «Россиянинг иттифоқчи сифатида ишончсиз экани ҳақидаги афсоналарни ёйиш — фитна қўзғатишдир. Лекин бу ҳаракатлар уларга наф келтирмайди, ўз мақсадларига эриша олмайдилар», — деди у. Президент сўзларига кўра, ҳозирги дунёда рўй бераётган ҳар бир низо ўзига хос хусусиятларга эга ва барча муаммоларни бир калипга солиб баҳолаш нотўғри.

Аввалроқ, Путин Исроил ва Эрон ўртасидаги тортишувларни изоҳлар экан, Россия ҳар икки давлат билан мулоқот ва ҳамкорлик алоқаларини сақлаб қолаётганини, Москва Эроннинг тинч ядровий дастур юритиш ҳуқуқини ҳам, Исроилнинг миллий хавфсизлигини таъминлаш интилишини ҳам ҳурмат қилишини билдирган эди.

Айтиш керакки, Эрон 2024 йилдан бошлаб BRICS, 2023 йилдан эса Шанхай Ҳамкорлик Ташкилоти аъзолари сафидан жой олган. Россия эса бу икки йирик минтақавий бирлашмада етакчи рол ўйнайди. Аммо Путин таъкидлаганидек, ушбу ташкилотлар ҳарбий блоклар эмас, асосий мақсади иқтисодий ва сиёсий шерикликни ривожлантиришга қаратилган.

Шу билан бирга, Россия ва Украина ўртасидаги урушда Эрон томони Москвага ҳарбий қўллов кўрсатиб, хусусан, «Шоҳид» жанговар дронларини етказиб бераётгани ҳақида халқаро оммавий ахборот воситалари кўп бор хабар тарқатган. Бу эса икки давлат ўртасидаги алоқалар янада мустаҳкамлигидан далолат беради.

Жаҳон сиёсий саҳнасидаги ҳар бир қадам, хусусан, Россиянинг иттифоқчилик мақоми ва ўзаро муносабатлари тўғрисидаги баҳслар ҳали кўп муҳокамаларга сабаб бўлиши шубҳасиз. Лекин Путиннинг бу галги баёнотлари Россия ўз манфаатларини ва халқаро шарикларига бўлган муносабатини аниқ ва очиқ-ойдин ифода этаётганини кўрсатади. «Замин»ни Telegram’да ўқинг!