Байден Вашингтонда сирли лойиҳа устида ишламоқда

АҚШнинг собиқ президенти Жо Байден сўнгги пайтларда ўз қароргоҳини ташлаб, Делавердан Вашингтонга поездда қатнаб, сирли фаолият билан шуғулланмоқда. Маълум қилинишича, Байден айни вақтда пойтахтдаги вақтинчалик офисида номаълум лойиҳа устида меҳнат қилмоқда. Бу ҳақда New York Post газетаси махсус таҳлилий мақола эълон қилди.

Байденнинг яқин доирасидаги манбалар таъкидлашича, собиқ президент ҳафтанинг кўп қисмини Вашингтонда ўтказмоқда ва унинг бундай фаоллиги атрофида ҳозирда жиддий саволлар туғилмоқда. "Бу ҳақиқатан ҳам жумбоқ", — дейди Байден маъмуриятининг собиқ аъзоларидан бири. Бироқ жамоа вакиллари оммавий ахборот воситаларининг бу борадаги саволларига жавоб беришдан қочмоқда.

Маълумотларга кўра, Байденга собиқ президент сифатида Вашингтон марказидаги офис 2024 йил июлига қадар бепул тақдим этилган. Ушбу жойда у Конгресс аъзолари, Демократлар партияси раҳбарлари ҳамда собиқ ёки ҳозирги ёрдамчилари билан учрашувлар ўтказмоқда. Шунингдек, телефон орқали сиёсий алоқаларни сақлаб қолишга ҳаракат қилмоқда.

Тахминларга қараганда, Байден ўз номига кутубхона ва фонд очиш, шунингдек, хотираларига бағишланган китоб ёзиш ниятида. Бу унинг сиёсий ҳаётини якунловчи муҳим лойиҳага айланиши мумкин.

Шу билан бирга, Байден оиласининг молиявий аҳволи ҳам муҳокама марказига айланган. Газета манбасининг маълум қилишича, у 400 минг долларлик маошдан маҳрум бўлгандан кейин Байденлар оиласи иқтисодий босимга дуч келган.

Собиқ президентнинг шахсий ҳаётидаги яна бир жиддий таҳликали янгилик — унда простата бези саратон касаллиги аниқлангани бўлди. 82 ёшли Байден май ойининг ўрталарида шифокорлар томонидан текширувдан ўтказилди ва мутахассислар унинг безида кичик тугун борлигини ҳамда саратон илдиз отганини маълум қилишди. Афсуски, касаллик аллақачон тўртинчи босқичга етиб, суякларга метастаз тарқатган.

Бундай вазиятда Байденнинг Вашингтондаги фаоллиги, унинг келгусидаги нақд ва сиёсий режалари янги муаммоларни туғдириши мумкин. Соғлиғига боғлиқ хавотирлар ва молиявий жиҳатдан босимда экани, собиқ президентни жиддий синовлар олдида қолдиргани аниқ. «Замин»ни Telegram’да ўқинг!