Озарбайжонда 7 журналист қамалди: сиёсий муҳокамалар кучаймоқда

2025 йил 20 июнь куни Озарбайжон пойтахти Боку шаҳридаги суд томонидан журналистларга нисбатан чиқарилган ҳукм жамоатчилик ва халқаро ташкилотлар эътиборини тортди. Суд қароригa асосан, етти нафар журналист турли муддатларга — 7,5 йилдан 9 йилгача озодликдан маҳрум этилди.

Қамалганлар орасида Abzas Media нашрининг раҳбари Улви Ҳасанли, бош муҳаррир Севиж Вагифқизи, таҳқиқотчи журналист Ҳофиз Бабали ҳамда “Озод Европа/Озодлик радиоси” мухбири ва иқтисодчи Фарид Меҳрализода каби таниқли шахслар бор. Уларнинг ҳар бирига 9 йиллик қамоқ жазоси тайинланган. Шунингдек, Abzas Media мухбирлари Наргиз Абсаламова ва Элнара Гасимова 8 йилга, нашр директори ўринбосари Маҳаммад Кекалов эса 7 йил 6 ойга озодликдан маҳрум қилинди.

Суд томонидан уларга нисбатан “контрабанда”, “солиқдан бош тортиш” ва “ноқонуний даромадларни қонунийлаштириш” моддалари бўйича жиноий иш қўзғатилгани хабар қилинган. Бироқ қамалганлар ва уларнинг адвокатлари бу айбловларни рад этиб, ишни тўлиқ сиёсий сабабларга эга деб ҳисоблашмоқда. Хусусан, “Озодлик” мухбири Фарид Меҳрализода айбловларни асоссиз, деб баҳолаб, жамоатчиликка мурожаат қилган.

Ушбу воқеа нафақат маҳаллий, балки халқаро инсон ҳуқуқлари ташкилотлари ва ОАВ эркинлигини ҳимоя қилувчи ташкилотлар томонидан ҳам катта эътибор билан кузатилмоқда. Кўплаб кузатувчилар ва фаоллар бу ишни Озарбайжонда сўз эркинлигига бўлган босим деб баҳоламоқда.

Журналистлар тақдири юзасидан муҳокамалар ҳали анча давом этиши кутилмоқда. Бу воқеа эса Озарбайжонда ОАВ фаолияти, ҳокимият ва жамият ўртасидаги муносабатларни яна бир бор кун тартибига олиб чиқди. «Замин»ни Telegram’да ўқинг!