Трамп эълон қилган оташкесим рад этилди: Эрон–Исроил низоси ҳал этилмади

Яқин Шарқда кескинликни камайтириш борасида янги қадамлар қўйилгани ҳақидаги хабарлар жамоатчилик орасида катта қизиқиш уйғотди. АҚШ президенти Дональд Трампнинг баёнотига кўра, Исроил ва Эрон ўртасида “12 соатлик тўлиқ ўт очишни тўхтатиш” бўйича келишувга эришилган. У, шунингдек, бу оташкесим урушни тугатиши кутилганини қайд этган. Бироқ воқелик бошқача бўлиб чиқди.

Эрон ташқи ишлар вазири Аббос Ароқчи мазкур маълумотни расман рад этди ва бу борада ҳеч қандай келишув ёки музокара бўлмаганини маълум қилди. Ароқчи ўз баёнотида, “Исроил режими Эронга қарши уруш бошлаган, аксинча эмас” деб урғулади ва ҳарбий ҳаракатларни тўхтатиш ҳақидаги қарор кейинроқ қабул қилиниши мумкинлигини айтди. Шу билан бирга, Эрон томони Исроил томонидан амалга оширилаётган ҳар қандай ноқонуний тажовузга жавоб беришга тайёр эканини аниқ билдирган.

Айни вақтда Эрон ташқи ишлар вазири расмий ташриф билан Москвада бўлиб турибди ва Россия президенти Владимир Путин билан учрашув ўтказган. Бу орқали Теҳрон дипломатик фронтда ҳам фаол ҳаракатларни давом эттирмоқда.

Эътиборли жиҳати шундаки, 23 июнь куни Эрон Қатардаги Америка ҳарбий базаларига қарши операция бошлагани маълум бўлди. АҚШнинг Ироқдаги базаси ҳам ҳужумга учраган. Қатар эса ўз ҳудудидаги базага берилган зарбаларни кескин қоралаб, мамлакатнинг жавоб қайтаришга тўлиқ ҳақли эканини билдирган. Саудия Арабистони ҳам ушбу баёнотни қўллаб-қувватлади. Шу сабабдан Яқин Шарқдаги бир қатор давлатлар хавфсизлик чораларини кучайтириб, ўз ҳаво ҳудудларини ёпишга мажбур бўлди.

Дональд Трамп эса оташкесим ҳақида расмий баёнот бериб, Исроил ва Эронга “12 кунлик уруш”ни тугатишдаги сабр-тоқати ва жасорати учун миннатдорчилик билдирган. Аммо 24 июнь куни воқеалар бошқача тус олди: Эрон ҳарбий ҳаракатларни тўхтатиш ёки келишувга эришилмаганини қайта таъкидлади ва Исроилнинг Беер Шева шаҳрига баллистик ракеталар билан зарба берди.

Мазкур вазият, Яқин Шарқдаги можаро кескинлик касб этаётганини ва дипломатик музокаралар мураккаб шароитда кечаётганини яна бир бор кўрсатиб турибди. Жаҳон ҳамжамияти эса, ушбу минтақада тинчлик ва барқарорликни таъминлаш учун ҳар икки томондан ҳам аниқ ва конструктив қадамларни кутишда давом этмоқда. «Замин»ни Telegram’да ўқинг!