АҚШнинг “Тунги болға” зарбаси Эрон ядро имкониятини йўқ қилдими?

Яқин Шарқдаги зиддият янада кескинлашди. АҚШ ва Эрон ўртасидаги мунтазам тортишувлар жиддий ҳарбий ҳаракатлар босқичига ўтди. АҚШ вице-президенти Жей Ди Венснинг таъкидлашича, Америка Қўшма Штатлари Эрон ядровий дастури билан боғлиқ энг муҳим инфратузилмаларни йўқ қилган. Бу ҳақда Fox News телеканали орқали маълум қилинди.

“Энди Эрон ядро қуроли яратишга қодир эмас”

“Президентимиз ўз салоҳиятини намоён этди — бирорта ҳам америкаликнинг ҳаётига зиён етказмасдан Эрон ядровий салоҳиятини йўқ қилди”, — деди Венс ўз чиқишида. Унинг сўзларига кўра, Эрон бугунги кунда мавжуд ускуналари билан атом бомбаси яратиш имкониятидан маҳрум бўлган.

Унинг фикрича, бир ҳафта аввал ҳам бу каби натижани тасаввур қилиб бўлмасди. Эрон ядро қуролига жуда яқин эди. Аммо 21 июнь куни амалга оширилган “Тунги болға” операцияси бу имкониятларни нолга тенглаштирди.

Фордо, Натанз ва Исфаҳондаги катта йўқотишлар

АҚШ томонидан берилган зарбалар Эроннинг ядровий марказлари — Фордо, Натанз ва Исфаҳонга қаратилди. Ден Кейн — Штаблар бошлиқлари бирлашган қўмитаси раиси — бу объектларга етказилган зарарни “ўта оғир” деб баҳолади.

Айни операция доирасида АҚШ сувости кемасидан Исфаҳон ядровий марказига йигирмадан ортиқ “Tomahawk” ракеталари учирилган. Шунингдек, Б-2 турдаги яширин бомбардимончилар, 125 дан ортиқ ҳарбий учқич, ёқилғи танкерлари ва бошқа қуролли техникалар миссияда иштирок этди.

Исроил ҳам фаол қатнашган

Жей Ди Венс, шунингдек, Исроилнинг ҳам бунда муҳим роль ўйнаганини таъкидлади. Унинг сўзларига кўра, яҳудий давлати нафақат Эроннинг ядро имкониятларига зарба берди, балки уларнинг анъанавий ракета салоҳиятини ҳам йўқ қилди.

Эрон энди тикланиши мумкинми?

Венсга кўра, АҚШ ҳозирги пайтда Эрон келгусида ядровий дастурини тиклашга ҳаракат қилмаслиги учун чоралар кўрмоқда. “Бу ҳам стратегик, ҳам сиёсий жиҳатдан муваффақиятли операция бўлди”, — дея хулоса қилди у.

Бу воқеа халқаро майдондаги муносабатларга жиддий таъсир кўрсатиши, Эрон ядровий дастури атрофидаги муаммолар эса яна кўп муҳокамаларга сабаб бўлиши кутилмоқда. «Замин»ни Telegram’да ўқинг!