Россия-КХДР стратегик ҳамкорлиги: қўшинлар, қуроллар ва янги келишувлар

Жанубий Корея разведкаси маълумотларига кўра, Шимолий Корея жорий йилнинг июль ёки август ойларида Россия ҳудудига қўшимча қўшин юбориши мумкин, деб хабар берди reuters.com. Мазкур маълумотга кўра, КХДР нафaқат жангчи аскарлар, балки турли ҳарбий қурувчилар, сапёрлар ва логистика гуруҳларини ҳам сафарбар этишга тайёргарлик кўрмоқда. Шу билан бирга, мамлакат Россия томонига қурол-яроғ ва ҳарбий техника етказиб беришни ҳам давом эттираётгани қайд этилган.

Жанубий Корея Миллий разведка хизмати (NIS) ўз таҳлилларида Россия президенти хавфсизлик хизмати юқори лавозимли амалдорининг яқинда Пхенянга қилган ташрифини муҳим факт сифатида келтирди. Бу ташриф икки давлат ўртасидаги ҳарбий ва техник ҳамкорликни янада мустаҳкамлагани айтилади. Шунингдек, Жанубий Корея разведкаси Шимолий Кореянинг қўшинларини Украинага қўшма операцияларда иштирок этиш учун тайёрлагани ҳақида маълумот олганини билдирган. Манбаларга кўра, КХДР бунинг эвазига Россиядан сунъий йўлдошларни учириш ва ракеталарни бошқариш бўйича техник маслаҳатлар олиши мумкин.

Охирги ойларда Россия ва Шимолий Корея ўртасидаги ҳарбий алоқалар сезиларли даражада фаоллашди. Жумладан, июн ойида Россия Хавфсизлик кенгаши котиби Сергей Шойгу Пхенянга икки марта расмий ташриф буюрган. Бу учрашувлардан сўнг, Ким Чен Ин томонидан Курск вилоятига минглаб сапёрлар ва ҳарбий қурувчиларни юборишга қарор қилинди. Шу тариқа, КХДР Украинада Россияни қўллаб-қувватлашга янада очиқ ва аниқ баёнот берди.

Жорий йил июнь ойида эса Россия ва Шимолий Корея ўртасида ҳар томонлама стратегик шериклик тўғрисидаги муҳим шартнома имзоланди. Унга кўра, ҳар икки давлатдан бирига ҳужум қилинган тақдирда, иккинчи тараф шошилинч ҳарбий ёрдам кўрсатиш мажбуриятини олган. Бу келишув, жаҳон ҳамжамиятида жиддий муҳокамаларга сабаб бўлди ва халқаро муносабатларда янги босқични бошлаб берди.

Манбалар таъкидлашича, апрел ойида Россия Бош штаби бошлиғи Валерий Герасимов биринчи бўлиб КХДР аскарларининг Курск вилоятида Украина Қуролли Кучларига қарши операцияларда иштирок этганини тасдиқлаган. Май ойида эса Россия президенти Владимир Путин Шимолий Кореяга кўрсатилган ҳарбий ёрдам учун расман миннатдорлик билдирди.

Шу ҳолат, минтақадаги геосиёсий вазиятнинг янада чигаллашишига, халқаро ҳамжамиятда янги хавотирлар уйғонишига сабаб бўлмоқда. Россия-КХДР ҳамкорлиги ва Украинадаги воқеаларнинг ривожи эса олдиндаги ҳафталарда яна кўплаб янги сиёсий таҳлил ва баҳсларга йўл очиши аниқ. «Замин»ни Telegram’да ўқинг!