Исроил операцияни якунлади: Эрон устидан стратегик ҳукмронлик ва янги сиёсий йўналиш

Яқин Шарқдаги муросасиз қарама-қаршиликлар тўфонида Исроил мудофаа вазири Исраэл Кац томонидан эълон қилинган “Арслондек халқ” операциясининг расман якунлангани халқаро майдонда катта шов-шувларга сабаб бўлди. 12 кун давом этган ва тарихий аҳамиятга эга бўлган ушбу операция Исроилнинг Эронга нисбатан янги ва анча қатъий сиёсий ва ҳарбий стратегияси бошланганини кўрсатди.

Вазир Исраэл Кац ўз баёнотида, мазкур ҳарбий амалиёт нафақат Исроил, балки дунё урушлари тарихида “шонли саҳифа” бўлиб қолишини таъкидлади. Унга кўра, операция чоғида Исроил ҳарбий-ҳаво кучлари Теҳрон ҳавосини ўзларига очишга эришган, Эрон ҳаво мудофаа тизимларини самарали йўқ қилган ҳамда Америка ва иттифоқчилар ёрдамида Эрон ядро дастурини издан чиқарган. Шу билан бирга, вазирнинг маълум қилишича, Исроил армияси Эроннинг юзлаб муҳим ҳарбий объектларига зарба берган, етакчи олим ва ҳарбий раҳбарларни йўқ қилган.

Мутахассисларнинг таъкидлашича, мазкур амалиёт нафақат Эрон ҳудудидаги ҳарбий инфратузилмага, балки минтақадаги геосиёсий мувозанатга ҳам жиддий таъсир кўрсатди. Кацнинг фикрича, Эрон йиллар давомида амалга оширган “Исроилни йўқ қилиш” дастурига чек қўйилди ва эндиликда Теҳрондаги раҳбарият буни яхши англаб олиши лозим.

Вазир Исроил армиясига Эрон устидан назоратни сақлаш, ядро дастурининг қайта тикланишига йўл қўймаслик ва террорчилик фаолиятини қўллаб-қувватлаганларга қарши кескин чоралар кўриш бўйича янги топшириқлар берганини маълум қилди. Шу билан бирга, у “Арслондек халқ” операциясини Исроилнинг янги сиёсий йўналишидаги “шунчаки реклама” деб атади ва 7 октябрдан кейин минтақада ҳеч қандай дахлсизлик қолмаганини қўшимча қилди.

Маълумотларга кўра, 2025 йил 13 июндан 25 июнгача давом этган амалиёт чоғида Исроил ҳарбий-ҳаво кучлари 1500 дан зиёд парвоз амалга оширган ва 900 дан зиёд нишонга аниқ зарбалар йўллаган. Операция натижасида Эроннинг 30 дан ортиқ юқори мартабали ҳарбий амалдори йўқ қилингани айтилмоқда.

Операция АҚШ президенти Доналд Трамп томонидан эълон қилинган оташкесим билан расман якунланди. Экспертлар фикрича, бу воқеалар Яқин Шарқдаги янги сиёсий мувозанат ва хавфсизлик тизимининг шаклланишига олиб келиши мумкин. Исроил томони эса ўзининг қўрқмас ва стратегик позицияси билан минтақада янги геосиёсий даврни бошламоқда.

Таҳлилчиларнинг фикрича, “Арслондек халқ” операцияси бутун дунё эътиборида ва унинг оқибатлари Яқин Шарқдаги курашлар географиясига янги ранг беради. Келгуси ҳафталарда минтақада қандай воқеалар ривож топиши катта қизиқиш билан кузатилмоқда. «Замин»ни Telegram’да ўқинг!