Американинг сиёсий саҳнасида навбатдаги катта силкинув — Илон Маск томонидан таклиф этилган “Америка” партияси ғояси жамоатчилик орасида жиддий қизиқиш уйғотмоқда, деб хабар берди quantusinsights.com. Quantus Insights сўрови натижасига кўра, америкаликларининг тахминан 40 фоизи бу партияни қўллаб-қувватлашга ёки унга овоз беришга тайёр эканини билдирган. Айниқса, ёш сайловчилар ва республикачи эркаклар орасида бу ғоя кўпроқ руҳлантирган.
Экспертлар фикрича, америкаликлар орасида ҳозирги сиёсий тизим мамлакат манфаатларини тўлақонли ифода этмаслиги ҳақидаги ишончсизлик кучайиб бормоқда. Сўров иштирокчиларининг 38 фоизи янги партияга қарши эканини билдирган бўлса, яна 22 фоизи ўз фикрини аниқ айта олмаган. Демократия тарафдорлари ва кекса авлод вакиллари бундай ташаббусга энг кўп шубҳа билан қарайди.
Таъкидланишича, Илон Маскнинг “Америка” партияси ғояси 30 июндан 2 июлгача 1 минг АҚШ фуқароси ўртасида ўтказилган сўровда синчковлик билан ўрганилган. Тадқиқотнинг статистик хатолиги 3 фоизни ташкил этади. Сўров натижалари Илон Маск томонидан ижтимоий тармоқда ҳам қўллаб-қувватланди — у ўз саҳифасида “Руҳлантиради” дея изоҳ қолдирди.
Маълумки, Маск ушбу партияни тузиш ғоясини июнь ойи охирида яна кўтарди. Унинг таъкидлашича, “Америка” партияси лойиҳаси Дональд Трамп илгари сураётган федерал харажатларни қисқартириш бўйича қонун лойиҳасига норозилик билдириш орқали юзага келган. Янги сиёсий лойиҳа мамлакатда янги тўлқинни бошлаб, сиёсий рақобатда ҳам, жамоатчилик кайфиятида ҳам жиддий ўзгаришларга сабаб бўлиши кутилмоқда.
Таҳлилчилар таъкидлашича, Илон Маскнинг ташаббуси АҚШ сиёсий муҳитида янгича фикр ва позицияга эҳтиёж кучайганини яна бир бор намоён этди. Мухлислар эса “Америка” партияси ғояси қанчалик оммалашиши ва мамлакат сиёсий манзарасида қандай ўрин эгаллашини катта қизиқиш билан кузатмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
