Покистоннинг Карачи шаҳридаги беш қаватли бино фожиали тарзда қулаб тушди

Покистоннинг энг катта шаҳарларидан бири бўлган Карачида навбатдаги фожиали воқеа бутун мамлакатда ва маҳаллий аҳоли орасида жиддий ташвиш ва қайғу уйғотди, деб хабар берди xunhua.org. Лиари туманида жойлашган беш қаватли турар жой биноси 4 июль куни тўсатдан қулагани оқибатида ҳалок бўлганлар сони расман 17 нафарга етди.

Ҳодиса жойига дарҳол давлат қутқарув хизматлари ва полиция сафарбар қилинди. 100 дан ортиқ қутқарувчи ва хизмат ходимлари ҳозиргача вайроналар остида қолганлар ва ҳалок бўлганларни қидиришда тинимсиз меҳнат қилмоқда. Вақеа тўғрисидаги маълумот тарқалганидан сўнг, бутун мамлакатда ушбу воқеа фаол муҳокамага айланди.

Қутқарув хизматлари махсус қурилмалар ёрдамида вайроналар остида тирик қолганлар бор-йўқлигини текширмоқда. Расмийлар айтишича, ҳозирча 10 нафарга яқин одамнинг ҳаёт белгиларини аниқлаш имкони бўлган. Аммо, афсуски, ҳалокат қурбонлари сони яна кўпайиши мумкинлиги тахмин қилинмоқда.

Гувоҳлар сўзларига кўра, бинода қулашдан бир неча соат аввал ер силкинишига ўхшаш кучли титрашлар сезилган, бироқ аҳоли буни зилзила деб ўйлаган ва етарлича жиддийлик билан эътибор бермаган. Маҳаллий маъмурият ва махсус хизматлар огоҳлантириш ва бинони бўшатиш ҳақида кўп бор мурожаат қилган бўлса-да, кўпчилик ўз уйларини тарк этмаган.

Карачи мэри Муртоза Ваҳоб таъкидлашича, мазкур бино аввалдан «хавфли» дея эътироф этилган ва унда истиқомат қилаётганларга кўчиб чиқиш буюрилган эди. Тергов органлари фожианинг сабабларини ўрганишни бошлади, шунингдек, яқин атрофдаги бинолар ҳам хавфсизлик нуқтаи назаридан текширилмоқда.

Мазкур воқеа яна бир бор шаҳардаги қурилиш сифатининг пастлиги, назоратнинг етарли эмаслиги ва фуқаролар хавфсизлигига бўлган эътибор кучайтирилиши зарурлигини кўрсатмоқда. Ҳозирда бутун шаҳар аҳолиси жабрланувчилар ва уларнинг оилалари тақдирига ҳамдардлик билдирмоқда, қутқарув ишлари эса ҳали ҳам давом этмоқда. «Замин»ни Telegram’да ўқинг!