Путин ва Трамп: Украина тақдири атрофидаги сиёсий шахмат ўйини

Россия ва Ғарб ўртасидаги сиёсий тортишувлар яна авж олди. The New York Times манбаларига таяниб ёзганидек, Кремлда Владимир Путин Украина устидан устунликка эришилганига ва яқин ойларда жанг майдонидаги вазият тубдан ўзгаришига ишонмоқда, деб хабар берди nytimes.com.

Путин Украина мудофааси яқинда қулаб тушиши мумкинлигини тахмин қилмоқда. Кремлга яқин манбаларнинг таъкидлашича, Россия армияси ҳужумларини янада кучайтирган ва шу шароитда Украина томонидан кенг кўламли ҳужумларсиз ҳарбий ҳаракатларни тўхтатиш ҳақида гап ҳам бўлиши мумкин эмас. Бу фикр Москвадаги ҳозирги сиёсий муҳитга мос келади — Кремль ҳозир фақат ғалаба ҳақида ўйлаяпти.

Бошқа томондан, Доналд Трамп сўнгги кунларда Путиннинг муросасиз ва қаттиққўл позициясига нисбатан очиқ норозилик билдиряпти. У, Россия етакчиси “кўп ваъда беради, аммо натижада гаплар амалда акс этмайди”, деган. Трамп февралдан бери Путин билан олти марта телефон орқали гаплашганини таъкидлаган. Бироқ, шу пайтгача Вашингтон Россияга қарши янги санкциялар жорий этмади, Украинага катта ҳарбий ёрдам кўрсатмади ва Москва талабларини рад этишда жиддий қадам ташламади.

The New York Times суҳбатдошларидан бирига кўра, Путин Трампнинг сабри якун топиши ва янги санкциялар киритилиши мумкинлигини яхши англаб турган ҳолда ҳаракат қилмоқда. Шунингдек, Кремль ҳозирча Ғарб билан мулоқотда эҳтиёткорлик билан қадам ташлаяпти, чунки асосий мақсад — Украина мудофаасини бутунлай йўқ қилиш ва Киевни музокарага мажбурлаш.

Трамп эса, охирги чиқишларида Путин позициясини танқид қилиб, “Россия етакчиси сўзда хушмуомала, аммо барчаси амалий қадамларга айланмаяпти”, деган. Шу билан бирга, у Россияга қарши янги санкцияларни жорий этиш масаласини “кўриб чиқаяпман”, дея жавоб берган.

Кремлда эса, Путин узоқ муддатли стратегик мақсадларни биринчи ўринга қўяётгани айтилади. Сиёсий таҳлилчилар фикрича, Путин эҳтимолий санкциялар ва янги босимларга қарамасдан, Ғарб билан алоқаларни ўз мақсадлари йўлида тортишга тайёр. Шу билан бирга, келажакдаги музокараларда санкцияларни юмшатиш бўйича келишув бўлишига ҳам умид қилади.

Украинадаги жанговар вазият эса ҳар куни ўзгариб бормоқда. Россия армияси позициясидаги оптимизм, Ғарбдаги шубҳалар ва Вашингтон-Москва ўртасидаги муносабатлар халқаро сиёсий саҳнада янги босқичга кўтарилди.

Бу воқеалар глобал сиёсий шахмат ўйинининг янги саҳифаси бўлиб қолмоқда. Олдинда қандай ўзгаришлар бўлишини эса, вақт кўрсатади. Аммо маълумки, ҳар бир сўз ва қарор Украина тақдирини белгилаб бериши мумкин. «Замин»ни Telegram’да ўқинг!