Актриса Жейн Биркинга тегишли бўлган ва Hermès брендининг машҳур Birkin моделини яратишга илҳом бўлган асл сумка Sotheby’s аукционида 10,1 миллион долларга сотилди. Бу модалар тарихи учун рекорд саналади — у дунёдаги энг қиммат сумкага айланди, деб ёзмоқда Kun.uz сайти.
Сумкани сотиб олган харидор япониялик шахсий коллекционер бўлиб, унинг шахсияти оммага ошкор этилмади.
Илгариги энг қиммат Hermès сумкаси 2021 йилда 513 минг долларга сотилган крокодил терисидан тикилган, бриллиантлар билан безатилган Kelly сумкаси эди.
Sotheby’s’нинг маълум қилишича, сумка 10 дақиқалик қизғин торгда, тўққиз нафар харидор иштирок этган жараёнда сотилган.
Мода оламининг орзу қилинган аксессуари
Қора чармдан тайёрланган ушбу сумка 1985 йилда актриса ва хонанда Жейн Биркин учун махсус яратилган. У самолётда Hermès компанияси раҳбари Жан-Луи Дюма билан ёнма-ён ўтирганида сумкасини тушириб юборган ва ичидаги буюмлар ерга сочилиб кетган.
Шунда у Hermès раҳбаридан нега аёллар учун каттароқ ва қулай сумкалар яратилмаслиги ҳақида сўрайди. Бу савол Жан-Луи Дюмани илҳомлантиради ва у кўп ўтмай янги сумка дизайнини тайёрлайди.
Айни ўша прототип Hermès тарихида янги саҳифа очган: кейинчалик унинг асосида яратилган Birkin сумкалари ҳашамат тимсолига айланади.
1994 йили Жейн Биркин мазкур сумкасини ОИТСга қарши курашишга бағишланган хайрия ташкилоти фойдасига аукционга қўйган.
Sotheby’s вакили Морган Ҳалими бу нарх сумканинг афсонавий тарихи ва ноёб меросига бўлган қизиқишни ёрқин намоён этишини айтди:
«Бу сумка – замонавий афсонанинг бошланиш нуқтаси. Айнан шу сумка туфайли дунё мода оламидаги энг кўп исталган аксессуарга эга бўлди», – деди у.
Бугунги кунда Hermès’нинг айрим Birkin моделлари ўн минглаб доллар туриши мумкин. Уларнинг эгалари орасида Виктория Бекҳэм, Кейт Мосс ва Женнифер Лопес каби юлдузлар бор. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
