Доналд Трампнинг Россия-Украина можаросини ҳал қилиш учун белгиланган янги 10-12 кунлик муддати халқаро сиёсат майдонида жиддий баҳсларга сабаб бўлди, деб хабар берди tass.ru. Россия Хавфсизлик Кенгаши раиси ўринбосари Дмитрий Медведев бу талабга нисбатан кескин муносабат билдириб, Америка раҳбарининг янгича ёндашувини “ультиматумлар ўйини” деб атади.
Медведевнинг фикрича, ҳар бир янги ультиматум музокараларнинг асосий моҳиятини йўққа чиқаради ва вазиятни янада мураккаблаштиради. У, айниқса, АҚШ президенти Доналд Трампнинг Россия ва Украина ўртасидаги низога чек қўйиш учун аввал белгиланган 50 кунлик муддатни кескин қисқартириб, энди 10-12 кун ичида натижа кутмоқда. Медведев буни таҳдид сифатида қабул қилиб, “Ҳар бир янги ультиматум таҳдид ва уруш томон қадамдир. Бу Россия ва Украина ўртасида эмас, балки АҚШнинг ўз ичидаги сиёсати билан боғлиқ”, – дея таъкидлади.
Россия Хавфсизлик Кенгаши раҳбарининг ўринбосари, шунингдек, Доналд Трампга мурожаат қилиб, Россия на Исроил, на Эрон эканини унутмасликни уқтирди. Унинг таъкидлашича, АҚШ президенти Россиянинг халқаро майдондаги мавқеи ва тарихий тажрибасини инобатга олиш кераклигини англаб етиши лозим.
Айни пайтда, Доналд Трамп Россия ва Украина ўртасида музокаралар 10-12 кун ичида натижа бермаса, Россиядан нефть ва газ импорт қилувчи давлатларга 100 фоизлик божлар жорий этишини билдирди. Бу эса халқаро иқтисодий муносабатларда ҳам янги босқични бошлаши мумкин.
Кузатувчилар фикрича, Медведевнинг жавоби ва Трампнинг ультиматуми Россия-АҚШ муносабатларида янги руҳ ва кескинликни пайдо қилаётганининг яна бир исботи бўлди. Минтақада вазият қандай тус олиши ва музокаралар қайси йўналишда давом этиши эса ҳалигача катта савол бўлиб турибди.
«Замин»ни Telegram’да ўқинг!
