Эроннинг олий раҳбари Али Хоманаий сўнгги чиқишида АҚШ ва Ғарб давлатлари билан муносабатлардаги асосий муаммоларга тўхталиб ўтди. Унинг таъкидлашича, Америка ядро дастури, уранни бойитиш ёки инсон ҳуқуқлари каби мавзуларни баҳона қилиб, аслида Эроннинг исломий эътиқоди ва мафкурасига қарши кураш олиб бормоқда.
Али Хоманаий шундай деди: “Улар ядро муаммоси, уранни бойитиш, инсон ҳуқуқлари ва шунга ўхшаш нарса деб атайдиган масалаларни кўтаришади, аммо бу фақат баҳона. Улар аслида бизнинг эътиқодимиз ва таълимотимизга рози эмаслар”. У бу сўзлар орқали ташқи босимлар Эроннинг ички қудрати ва ишончини синашга қаратилганини қайд этди.
Раҳбарнинг фикрича, сўнгги йилларда юз берган ҳарбий зиддият ва мураккаб вазиятлар ҳам мамлакатнинг мустақил иродаси ва тизимнинг мустаҳкамлигига яққол мисол бўлди. Али Хоманаий: “Охирги уруш Ислом Республикаси иродаси ва қудратининг намоён бўлиши билан бирга тизим асосларининг ўзига хос мустаҳкамлигини ҳам кўрсатди. Душманларга қарамай, биз Эронни тараққиёт ва шон-шуҳрат чўққиларига олиб чиқа оламиз”, – деб қўшимча қилди.
Мутахассислар таъкидлашига кўра, Эрон–АҚШ ўртасидаги асосий қарама-қаршиликлар, айниқса, идеологик ва эътиқодий майдонда тўпланиб бормоқда. Шунинг учун, икки давлат муносабатларида дипломатик ва сиёсий босимлар сақланиб қолиши табиий ҳол сифатида баҳоланмоқда.
Эрон раҳбарияти эса, мамлакатни ташқи босимлар ва таҳдидларга қарамасдан, янада ривожлантириш ва халқаро майдонда ўз ўрнини мустаҳкамлашга интилмоқда. Жамоатчилик эса, бу жараённинг қай тарзда давом этишини ва келгусида қандай натижалар бўлишини катта қизиқиш билан кузатишмоқда.
«Замин»ни Telegram’да ўқинг!
