Трампнинг нутқидаги оғишлар ортида жиддий ҳолат борми?

Сиёсий саҳнада доимий равишда марказда бўлиб келган Дональд Трамп атрофида яна тортишувлар ва муҳокамалар тобора кўпаймоқда. Бу сафар эътибор марказига унинг сўнгги нутқлари тушди. Таҳлилчилар ва мутахассислар фикрича, АҚШ президентининг охирги пайтлардаги жамоат олдидаги чиқишларида шубҳали жиҳатлар кўзга ташланмоқда.

Уларнинг таъкидлашича, Трампнинг оммавий чиқишлари пайтида билдирган ғалати баёнотлари ортида когнитив, яъни идрок ва фикрлаш билан боғлиқ муаммолар бўлиши эҳтимоли бор. Бу фикрлар тасодифий эмас – нутқ жараёнида мавзуларни кутилмаган ҳолда алмаштириши, сўзлар оралиғида аниқ изчилликнинг йўқлиги, бир масаладан бошқасига кескин сакраши ана шундай хулосага олиб келмоқда.

Мутахассислар таъкидлаган яна бир муҳим жиҳат – Трамп суҳбат давомида мавзуни тушунарсиз равишда ўзгартириб юбориш тенденциясини намоён қилмоқда. Яъни, у гоҳ сиёсий масалалар ҳақида гапираётган бўлса, бир пайтнинг ўзида шахсий манфаатлар ёки бутунлай бошқа мавзуга ўтиб кетади. Бу ҳолат унинг нутқларида мунтазам кузатилмоқда.

Нашр маълумотига кўра, сайловолди кампанияси доирасида Трамп ўз ваъдаларининг бажарилиши ҳақида тўхталиб ўтар экан, бир зумда шахсий имтиёзларга оид гапларга ўтиб кетган. Шу билан бирга, гап ўртасида кутилмаган ҳолда уйларга сув етказиб бериш масаласига алоқадор фикр билдирган.

Бу каби оғишлар, шубҳасиз, жамоатчиликда саволлар туғдиради. Трампнинг бундай нутқлари унинг руҳий ҳолати ёки умумий саломатлиги билан боғлиқ муаммолардан даракми? Ёки бу унинг ўзига хос услубими?

Айни пайтда АҚШ сиёсий муҳитида қизғин баҳслар бўлиб, Трампнинг яна сайловда иштирок этиш нияти ҳам фаол муҳокама қилинмоқда. Унинг сўзларидаги кескин бурилишлар ва кутилмаган мавзуларни алмаштириш ҳолатлари сайловчилар ва таҳлилчилар учун катта қизиқиш уйғотмоқда.

Шундай экан, АҚШ сиёсий саҳнасида яна бир бор муҳокамалар марказида турган Трампнинг нутқлари ҳам синовдан ўтаётгандек. Айни пайтда жамоатчилик унинг ҳар бир чиқишига алоҳида эътибор билан қарамоқда. Чунки, бундай ҳаракатлар катта сиёсий жараёнлар арафасида бўлиши мумкин.

Шухрат Раззаков

«ЗАМИН.УЗ» муҳаррири