Россия қўшинлари томонидан Харкив вилоятида жойлашган Лозовая шаҳрига амалга оширилган сўнгги ҳужум Украинада яна қайғули ва даҳшатли лаҳзаларни юзага келтирди. Бу ҳақда шаҳар маъмурияти раиси Сергей Зеленский 5 август куни, сешанба тонгги баёнотида маълум қилди.
Маълум қилинишича, ҳужум оқибатида шаҳардаги муҳим инфратузилма объектлари, кўп қаватли турар-жой бинолари ва шахсий сектордаги уйлар жиддий шикастланган. Зеленскийнинг таъкидлашича, ушбу зарба натижасида бир нечта фуқаро тан жароҳати олган, улар орасида икки нафар ёш бола ҳам бор.
"Лозовая бундан аввал бундай кучли ва кенг қамровли ҳужумни бошидан ўтказмаганди. Бу уруш бошланганидан бери шаҳар кўрган энг оғир зарба бўлди", — деди Зеленский ўз баёнотида. "Ҳозирда қутқарувчилар, шифокорлар ҳамда шошилинч тиббий ёрдам жамоалари ҳалокат оқибатларини бартараф этиш устида тинимсиз иш олиб бормоқда. Зарар кўрган ҳудудлар қайд этилмоқда, сув таъминоти қайта тикланмоқда. Айрим туманлар, жумладан Авиловка ва Катеринивка старостин округи ҳозирча электрсиз қолган", — деб қўшимча қилди шаҳар раҳбари.
Ҳозирча Лозовага қилинган ўқ-яроғ зарбаларида аниқ қайси турдаги қуроллар қўллангани расмий баёнотларда кўрсатилмаган. Аммо Украина ҳаво кучлари ҳужум арафасида ушбу шаҳар йўналишида Россия томонидан учирилаётган дронлар ҳаракати аниқлангани ҳақида олдиндан огоҳлантирган эди.
Шу билан бирга, Украина президенти Володимир Зеленский ҳужум содир бўлишидан бир кун аввал, яъни 4 август куни Харкив вилоятига ташриф буюргани маълум. Президентнинг ушбу сафаридан сўнгоқ ушбу ҳужум рўй бергани эса айрим таҳлилчилар томонидан провокацион ҳаракат сифатида баҳоланмоқда.
Украина ҳаво кучлари томонидан берилган сўнгги маълумотларга кўра, 5 августга ўтар кечаси Россия Федерацияси Украина ҳудудига 46 та Shahed туркумига мансуб ҳужумкор учувчисиз учоқлар, шунингдек, турли моделдаги дрон имитаторлари ва “Искандер-М” турдаги баллистик ракета ёрдамида ҳужум қилган.
Мазкур ҳаракатлар нафақат Лозова, балки Украинадаги бошқа шаҳарлар аҳолисининг тинчлигини ҳам жиддий равишда бузди. Бу ҳодиса Россия ва Украина ўртасидаги ҳарбий зиддият яна қанчалик кучайганини кўрсатмоқда.
Фуқаролар эса ҳозирда ўз жонларини асраш учун паноҳ излашга мажбур бўлмоқда. Лозовада содир бўлган ушбу мудҳиш воқеа урушнинг яна қанчалик инсонлар ҳаётига салбий таъсир ўтказаётганини эслатиб турибди. Тез орада тинчлик қарор топишига умид қилинаётган бир вақтда, ҳар бир бундай ҳужум ушбу умидларни синовга қўймоқда.
Фото: Reuters
