Европа аэропортларида юзлаб миллион йўловчини безовта қилиб келаётган суюқликлар ҳажмига оид 100 миллилитрлик чеклов тез орада ўтмишга айланиши мумкин. Бу ҳақдаги янгилик Еврокомиссия манбаларига асосланган ҳолда, Euronews нашри орқали тарқатилди.
Мазкур чеклов аввалбошдан хавфсизлик мақсадида жорий этилган бўлиб, анъанавий рентген қурилмалари суюқ шаклдаги портловчи моддаларни аниқлай олмагани сабабли амалга киритилган эди. Аммо технология тараққиёти туфайли вазият тубдан ўзгармоқда.
Хусусан, янги авлод сканер ускуналари орқали бу каби моддаларни аниқлаш имконияти пайдо бўлди. Бу эса чекловлар қайта кўриб чиқилишига олиб келмоқда. Европа фуқаро авиацияси конференциясида июнь ойида маъқулланган янги тизим ҳозирда ишлаб чиқарувчилар томонидан синовдан ўтказилмоқда. У расман тасдиқлангач, кенг миқёсда жорий этилиши кутилмоқда.
Ҳозирда Рим ва Милан каби йирик Италия шаҳарларидаги айрим аэропортларда ушбу технологиялар синов тарзида ўрнатилди. Италиядаги 7 та терминал замонавий сканерлар билан жиҳозланган бўлиб, улар орқали йўловчилар каттароқ ҳажмдаги суюқликларни қўл юкида олиб ўтиш имконига эга бўлмоқдалар.
Европа бўйлаб бошқа мамлакатлар ҳам бу жараёнга қўшилмоқда. Жумладан, Германия, Ирландия, Литва, Малта, Швеция ва Нидерландиядаги бир нечта аэропортлар ҳам яқин вақтларда ушбу технологияни жорий қилишни режалаштирмоқда.
Бундай ўзгаришлар, албатта, миллионлаб йўловчилар учун қулайлик яратиши кутилмоқда. Энди косметика, парфюмерия ёки шифобахш воситаларни махсус идишларга солиб, қайта-қаита ўлчаш ва чегаралаш талаб этилмаслиги мумкин.
Бироқ бу тизимнинг кенг қўлланилиши маълум вақт талаб қилиши мумкин, чунки янги ускуналар анъанавий қурилмаларга нисбатан анча қиммат ва ҳар бир аэропортда уни жорий этиш учун муайян бюджет ва техник тайёргарлик керак бўлади.
Шу билан бирга, янги тизим халқаро ҳаво қатнови хавфсизлигини янада мустаҳкамлашга хизмат қилиши шубҳасиз. Европа Иттифоқи бу йўналишда замонавий ёндашувни танлаб, инсоний омилга кўпроқ эътибор қаратмоқда. Жамоатчилик эса яқин келажакда бундай қулайликлар ҳаётларига қандай таъсир қилиши мумкинлигини қизиқиш билан кутмоқдалар.
«Замин»ни Telegram’да ўқинг!
