Жаҳон сиёсий саҳнасида яна жиддий ҳаракатлар кузатилмоқда. АҚШ ва Россия раҳбарлари Украинадаги қуролли тўқнашувни тугатиш мақсадида ўзаро келишув ишлаб чиқиш йўлида музокаралар олиб бормоқда. Бу ҳақда Bloomberg агентлиги ўз манбаларга таяниб хабар берди.
Маълум қилинишича, ҳозирда муҳокама қилинаётган келишув лойиҳаси, асосан, Россия Федерациясининг босиб олинган ҳудудлар устидан назоратини мустаҳкамлашга қаратилган. Хусусан, Владимир Путин Донецк ва Луганск (кенг маънода бутун Донбасс), шунингдек, Қрим яриморолини расман Россия ҳудуди сифатида тан олишни талаб қилмоқда.
Bloomberg’нинг маълумотларига кўра, агар ушбу талаблар қабул қилинса, Кремль Херсон ва Запорожье вилоятларидаги жорий фронт чизиқлари бўйлаб ҳарбий ҳаракатларни тўхтатишга тайёрлигини билдирмоқда. Шу тариқа, Москва бу минтақалардаги кескинликни камайтиришга розилик бериши мумкин.
Айни вақтда, Вашингтон ва Москва дипломатлари келаси ҳафта ўтказилиши кутилган Трамп ва Путин учрашувига тайёргарлик кўраётгани таъкидланмоқда. Саммитда айнан шу ҳудудий масалалар юзасидан муҳокамалар ўтказилиши ва келишув бўйича келишиб олиш мақсад қилинган.
Шу билан бирга, АҚШ маъмурияти бу жараёнга Украина ва Европа иттифоқчилари розилигини ҳам таъминлашга ҳаракат қилмоқда. Аммо ҳозирча бу келишувга эришиш бўйича аниқ кафолатлар йўқлиги ҳам маълум қилинган. Ҳатто музокаралар муваффақиятсиз якунланиши эҳтимоли ҳам истисно қилинмаяпти.
Ушбу битим орқали жанг ҳаракатларини музлатиш ва кейинчалик узоқ муддатли тинчлик жараёнини бошлашга йўл очиш кўзда тутилган. Аввалроқ Вашингтон расмийлари Москвадан шартсиз равишда ўт очишни тўхтатиш ва музокаралар учун зарур муҳитни яратишни сўраган эди.
Шу билан бирга, Россия президенти Путин ўзининг ҳарбий ва сиёсий мақсадларида ҳеч қандай ўзгариш бўлмаслигини бир неча бор очиқ айтган. Унинг асосий талаблари орасида Украинага нейтрал мақом бериш, НАТО аъзолигидан воз кечиш, шунингдек, Қрим ва Украина шарқий ҳамда жанубий вилоятларини Россия таркибида деб тан олиш масалалари бор.
Эслатиб ўтамиз, Украина Конституциясига кўра, мамлакат ҳудудий яхлитлигини таъминлаш — маҳкам ва бузилмас қонуний асосга эга. Киев ҳукумати Россиянинг босиб олиш ҳаракатларини қатъий рад этган ҳолда, ҳеч қандай ерни бой бериш нияти йўқлигини таъкидламоқда. Шунингдек, улар аннексияни мутлақо тан олмаслигини расман билдирган.
Сиёсий вазият тобора мураккаблашиб бораётган бир пайтда, жаҳон ҳамжамияти ушбу музокаралар орқали ўзаро келишув йўлида жиддий бурилиш юз беришига умид боғламоқда. Аммо ҳозирча бу фақат эҳтимоллар доирасида қолмоқда.
«Замин»ни Telegram’да ўқинг!
