АҚШ президенти Доналд Трамп 15 август куни дунё сиёсий саҳнасида катта аҳамиятга эга воқеа рўй беришини маълум қилди. Унинг айтишича, айнан шу куни Америка Қўшма Штатлари ҳудудидаги энг йирик ва стратегик аҳамиятга эга ҳудудлардан бири – Аляска штатида Россия президенти Владимир Путин билан узоқ вақтдан бери кутилган учрашув бўлиб ўтади. Мазкур хабар 8 август, жума куни, Трампнинг шахсий Truth Social ижтимоий тармоғида расман эълон қилинди.
Трамп ўз постида қуйидагиларни ёзди:
«Мен, Америка Қўшма Штатлари президенти сифатида, Россия Федерацияси президенти Владимир Путин билан ўтказиладиган узоқ кутилган саммитни эълон қиламан. У келаси жума, 2025 йил 15 август куни, Аляска буюк штатида ташкил этилади. Батафсил маълумотлар яқин кунларда тақдим этилади».
Шунингдек, ундан бир неча соат олдин Оқ уйда журналистлар саволларига жавоб берган Трамп Россия ва Украина ўртасидаги эҳтимолий тинчлик келишуви ҳақида ҳам фикр билдирди. Унинг таъкидлашича, келишувда «ҳудудлар алмашинуви» элементлари бўлиши мумкин. «Ўзаро манфаатлар йўлида маълум ҳудудлар алмаштирилади... Ниманидир қайтарамиз, ниманидир алмаштирамиз», — деди у ва бу масала юзасидан яқин орада аниқ музокаралар ўтказилишини қўшимча қилди.
Россия президенти ёрдамчиси Юрий Ушаков ҳам бу маълумотни тасдиқлади. Унинг сўзларига кўра, икки давлат етакчиларининг Аляскадаги саммити мантиқан тўғри қарор, чунки Россия ва АҚШ географик жиҳатдан яқин қўшни ҳисобланади. РИА "Новости" хабарига кўра, Ушаков учрашувга тайёргарлик осон кечмаслигини, бироқ томонлар бу йўналишда жадал ва самарали иш олиб боришларини таъкидлади.
Ушаков қўшимча қилиб, Москва ва Вашингтон яқин бир неча кун ичида Аляскадаги саммитнинг амалий ва сиёсий параметрларини илгари суришга бор кучини йўналтиради, деди. «Бу жараён енгил бўлмайди, бироқ биз фаол ва қатъият билан ишлаймиз», — дея унинг сўзларини "Интерфакс" агентлиги келтирди.
Маълумотларга кўра, Путин ва Трамп музокаралар чоғида асосий эътиборни Украинадаги урушни узоқ муддатли барқарор тартибга солиш масаласига қаратмоқчи. Шунингдек, Аляскадаги учрашувдан сўнг президентларнинг навбатдаги мулоқоти Россия ҳудудида ўтказилиши эҳтимоли юқори. «Тегишли таклиф аллақачон АҚШ президентига етказилган», — деди Ушаков.
Бу янгилик халқаро сиёсатда катта қизиқиш уйғотди. Чунки икки йирик давлат етакчиларининг юзма-юз учрашуви нафақат икки томонлама муносабатларга, балки жаҳон геосиёсий вазиятига ҳам таъсир кўрсатиши кутилмоқда.
«Замин»ни Telegram’да ўқинг!
