Яқин Шарқдаги зиддият янада қизиб борар экан, Исроил сиёсий саҳнасида Ғазо шаҳри ва бутун Ғазо сектори устидан назорат ўрнатиш режаси жиддий баҳс ва тортишувларга сабаб бўлди.
8 август куни Исроил мухолифати етакчиси Яир Лапид хавфсизлик кабинетининг қабул қилган янги қарорини қаттиқ танқид остига олди. Унинг таъкидлашича, ҳукуматнинг Ғазо шаҳрини эгаллаш ва у ердаги ҲАМАС ҳаракатини тўлиқ мағлуб этиш режаси “кўплаб бошқа оғир ва қайғули оқибатларга олиб келиши мумкин бўлган фалокатли қадам” ҳисобланади, деб ёзади Лапид ўзининг X ижтимоий тармоғидаги саҳифасида.
Лапид фикрича, бундай ҳаракат нафақат минтақадаги зиддиятни янада кучайтиради, балки исроиллик гаровга олинган шахслар ҳамда кўп сонли аскарлар ҳаёти хавф остида қолишига олиб келади. У бош вазир Бинямин Нетаняҳуни армия раҳбариятидаги жиддий эътирозларга қарамасдан, ўта ўнг сиёсий қанотдаги ҳамкорлари — миллий хавфсизлик вазири Итамар Бен-Гвир ва молия вазири Бецалел Смотрич босимига берилишда айблади.
Маълумотларга кўра, мазкур икки вазир Исроил ҳукуматидан бутун Ғазо сектори устидан тўлиқ назорат ўрнатиш ва у ерда яшовчи тахминан 2 миллион фаластинликни чиқариб юборишни талаб қилмоқда. Бу талаб, ўз навбатида, халқаро майдонда ҳам жиддий танқид ва хавотир уйғотмоқда.
8 август тонггида Исроил хавфсизлик маҳкамаси Фаластиннинг ҲАМАС ҳаракатини “мағлуб этиш” ва Ғазо шаҳри устидан тўлиқ назорат ўрнатиш режасини маъқуллади. Бу қарор тунги муҳокамалардан сўнг, урушни тўхтатиш ҳақидаги халқаро чақириқлар тобора кучайиб, мамлакат ичида эса ҲАМАС томонидан гаровга олинганлар тақдири юзасидан норозиликлар кўпайиб бораётган бир пайтда қабул қилинди.
Бош вазир Бинямин Нетаняҳу эса бу режалар ҳақида аввалроқ Американинг Fox News телеканалига берган интервьюсида айтиб ўтган эди. Унинг сўзларига кўра, Исроил ҳукумати бутун Ғазо сектори устидан назорат ўрнатиш ниятида. Ҳозирда эса Исроил армияси эксклав ҳудудининг тўртдан уч қисмини назорат қилиб турибди.
Аниқ натижа ва вазият ривожини эса фақат вақт кўрсатади. Савол эса шунда қолмоқда: бу режа минтақада тинчлик ва барқарорликка йўл очадими ёки зиддиятларни янада кучайтирадими?
«Замин»ни Telegram’да ўқинг!
