Украина президенти Владимир Зеленский яна бир бор мамлакатнинг ҳудудий яхлитлиги масаласидаги қатъий позициясини дунёга эълон қилди. Унинг таъкидлашича, Россиянинг Украина ерларини ўз тасарруфига олиш истаги қанчалик кучли бўлмасин, украин халқи елкадош бўлиб, биргаликда ҳаракат қилаётган экан, бу истак амалга ошмайдиган орзу бўлиб қолаверади.
Зеленскийнинг айтишича, Украина ва АҚШ ўртасидаги алоқалар куну тун, турли даражаларда олиб борилмоқда. Президент бу жараёнда барча маълумотлар очиқланмаслигини, чунки дипломатияда айрим масалалар сир сақланиши зарурлигини таъкидлади.
Давлат раҳбари ўз нутқида тарихий воқеликларга ҳам тўхталди. Унинг фикрича, Россияга Қримни эгаллашга йўл қўйилгани — кейинчалик Донецк ва Луганск вилоятларининг айрим қисмларини босиб олишга сабаб бўлди. Шунингдек, Украина чегарасида қўшинлар тўпланган пайтда жавоб чораларининг йўқлиги кенг кўламли урушга йўл очди.
Зеленский сўзларига кўра, ҳозирда Владимир Путин Херсон вилоятининг жанубий қисми, Запорожья, бутун Луганск вилояти, Донецк ва Қрим устидан тўлиқ назорат ўрнатгани учун “кечирилиш”ни талаб қилмоқда. Бироқ Украина президенти буни мутлақо қабул қилмаслигини ва мамлакат бўлинишига йўл қўймаслигини қатъий таъкидлади.
Унинг баёноти мамлакат ичида ва халқаро миқёсда катта резонанс уйғотди. Кўплаб таҳлилчилар бу чиқишни Украина томонидан яна бир дипломатик огоҳлантириш сифатида баҳоламоқда. Украиналиклар эса Зеленскийнинг қатъий позициясини қўллаб-қувватлаб, мамлакатнинг келажаги фақат бирлик ва жасоратда эканини эътироф этмоқда.
«Замин»ни Telegram’да ўқинг!
