Боливияда муҳим сиёсий жараён – президентлик сайловлари давом этаркан, овоз бериш жараёнида кутилмаган воқеа содир бўлди. Мамлакатдаги президентликка номзод Андронико Родригес овоз бериш учун келиши кутилган сайлов участкаси яқинида портлаш юз берди, деб хабар бермоқда El Deber нашри.
Маълумотларга кўра, портлаш динамит таёқчаси ёрдамида амалга оширилган бўлиши мумкин. Гувоҳларнинг айтишича, кучли портлаш кузатилмаган, бироқ ҳодиса одамлар орасида ҳаяжон ва хавотир уйғотди.
Ҳуқуқ-тартибот идоралари ходимлари тезда воқеа жойига етиб бориб, ҳодиса юзасидан тергов ишларини бошлади. Шу билан бирга, сайлов участкасида ҳарбийлар ва полиция томонидан хавфсизлик чоралари кескин кучайтирилди.
Расмий маълумотларга кўра, портлаш оқибатида қурбонлар ва жабрланувчилар қайд этилмаган. Родригес маҳаллий вақт билан соат 11:00 да ўз овозини беришни режалаштиргани айтилмоқда.
Мутахассислар таъкидлашича, бундай ҳолатлар мамлакатдаги сиёсий жараёнларга таъсир кўрсатиш эҳтимолига эга. Боливиядаги жамоатчилик эса бу воқеадан сўнг сайлов жараёни хавфсизлиги юзасидан қатор саволлар билан қизиқмоқда.
«Замин»ни Telegram’да ўқинг!
