Вашингтонга Доналд Трамп билан учрашиш учун ташриф буюрган Украина президенти Владимир Зеленский ўз мамлакатининг ҳарбий ҳаракатларни якунлаш ва узоқ муддатли тинчликка эришишга интилаётганини таъкидлади. Унинг сўзларига кўра, бутун дунё фақат урушни эмас, балки тинчликни ҳам тезда тиклашни хоҳлайди. Аммо бу тинчликни таъминлаш, барқарор ва узоқ муддатли бўлиши керак.
"Бу урушни тезроқ ва ишончлироқ тугатишни ҳаммамиз бирдек истаймиз. Тинчлик эса узоқ давом этиши керак. Бир неча йиллар аввал Украинани Қрим ва Донбасснинг бир қисмини беришга мажбур қилишди. Путин эса бундан шунчаки янги ҳужум учун плацдарм сифатида фойдаланди. Энди бундай бўлмаслиги керак. Ёки 1994 йилда Украинага гўёки «хавфсизлик кафолатлари» берилган, аммо бунинг фойдаси бўлмади. Албатта, 2022 йилдан кейин украиналиклар Киев, Одесса, Харковни бермагани каби Қримни ҳам бермаслик керак эди", — деди Владимир Зеленский.
Зеленский ўз сўзларида Украина халқи ва унинг жангчилари Донецк ва Суми вилоятларида жуда катта муваффақиятларга эришганини ҳам таъкидлади. У, шунингдек, АҚШ ва Европа мамлакатларига миннатдорлик билдириб, уларнинг бебаҳо ёрдами Украина учун жуда муҳим эканини айтди. Унинг фикрича, Россия ўзи бошлаган бу урушни тугатиши керак ва Америка, Европа ҳамкорлари билан биргаликда Россияни ҳақиқий тинчликка мажбурлашлари мумкин.
Трамп, Зеленскийнинг Вашингтонга ташрифи арафасида, агар Украина Россия билан урушни тезда тугатмоқчи бўлса, Қримдан ва НАТО аъзоси бўлишдан воз кечишга тайёр бўлиши кераклигини айтди.
АҚШ давлат котиби Марко Рубио эса, NBC News телеканалига берган интервьюсида Киевни Қрим ва Украина томонидан бой берилган бошқа ҳудудлар ҳақида сўралган саволга жавобан, уларни беришга "ҳеч ким мажбурламаётганини" таъкидлади, шу билан бирга тинчлик келишуви амалга ошмаслиги мумкинлигини ҳам эътироф этди.
18 август куни Оқ уйда Доналд Трамп, Владимир Зеленский ва Европа етакчилари иштирокида муҳим учрашув режалаштирилган. ОАВ маълумотларига кўра, Киев ва Европа АҚШ ва Россия етакчилари Аляскадаги уч соатлик суҳбат чоғида нимага келишиб олганини ҳали тўлиқ тушунмаяпти, шунинг учун Трамп уларга шахсан изоҳ бериши кутилмоқда.
