Украинада катта резонанс уйғотган воқеалардан бири — Херсон шаҳрининг собиқ мэри Володимир Миколаенконинг озодликка чиққани ва Ватанга қайтиши бўлди. У Россия томонидан асирга олинганидан кейин узоқ вақт қамоқда сақланган эди.
Маълумки, Миколаенко 2022 йил баҳорида шаҳар босиб олингач, камера олдида Украина қаҳрамони Юрий Шухевичдан воз кечишдан кескин бош тортгани билан эл орасида эътироф этилган. У ўша вақтда қатъият билан шундай деганди:
“Шухевич Украина озодлиги учун курашган. У ҳеч қачон фашистик Германия томонида эмас, балки ўз мамлакати учун майдонга тушган. Украина унга қаҳрамон унвонини берган, демак, у ҳақиқий қаҳрамон”.
Украина ОАВ тарқатган хабарларда қайд этилишича, россиялик ҳарбийлар Миколаенкога бир неча бор ҳамкорлик таклиф қилишган. Бироқ у қатъий равишда рад этган. Қариндошларининг сўзларига кўра, айнан шу принципиал позиция унинг ҳибсга олинишига асосий сабаб бўлган.
Ниҳоят, узоқ муддатли асирликдан сўнг Володимир Миколаенко эркинликка чиқди. Озодликка чиққанидан кейин у журналистларга шундай деди:
“Мен бу вақт давомида бетон деворлар ва панжаралардан бошқа ҳеч нарсани кўрмадим. Шу сабаб бугунги кун мен учун иккинчи туғилган кун билан баробар”.
Бу воқеа нафақат Украина жамоатчилиги учун, балки бутун дунёдаги инсон ҳуқуқлари ҳимоячилари учун ҳам умид ва сабр-матонат рамзи сифатида қабул қилинмоқда. Миколаенконинг қайтиши халқ учун катта қувонч ва эркинликка бўлган ишончнинг яна бир далили бўлди.
«Замин»ни Telegram’да ўқинг!
