Яқин Шарқдаги мураккаб сиёсий вазият янги дипломатик мулоқотларга сабаб бўлди. АҚШ махсус вакили Том Барак якшанба куни Исроилга ташриф буюриб, Бош вазир Бенямин Нетаняху билан учрашди. АҚШ ва Исроил манбаларига кўра, суҳбатнинг асосий мавзуси Доналд Трамп маъмуриятининг Ливанга зарба беришни тўхтатиш ҳақидаги илтимос-таклифи ҳамда Сурия билан янги музокара жараёнларини йўлга қўйиш масаласи бўлди. Айни пайтда, икки томон кескинликни юмшатиш ва хавфсизлик бўйича янги форматларни ишлаб чиқиш йўлларини муҳокама қилгани қайд этилди.
Том Барак ташриф давомида стратегик йўналишларда ҳам алоҳида мулоқотлар ўтказди. Унинг суҳбатдошлари орасида давлат котиби Рон Дермер, ташқи ишлар вазири Гидеон Саар ва мудофаа вазири Исраел Кац ҳам бор эди. Учрашувларда чегараларда хавфсизлик чораларини кучайтириш, фавқулодда вазиятларнинг олдини олиш ва икки давлат ҳамкорлик каналларини мустаҳкамлашга оид амалий механизмлар муҳокама қилинди.
Манбалар таъкидлашича, Вашингтон маъмурияти дастлабки қадам сифатида Исроил—Ливан ва Исроил—Сурия ўртасида хавфсизлик бўйича янги келишувларга эришишни кўзламоқда. АҚШнинг фикрича, Ғазода давом этаётган тўқнашувлар шароитида Исроил учун қўшнилар билан чегаралар бўйича кескинликни пасайтириш ва барқарорликни таъминлаш стратегик аҳамият касб этади.
Шу йўналишда хавфсизлик хатларини аниқ белгилаш, қуролли тўқнашувлар эҳтимолини пасайтириш, фавқулодда ҳолатларга жавоб бериш протоколларини мувофиқлаштириш устувор йўналиш сифатида кўрсатилди. Шунингдек, алоқа каналларини доимий фаол ҳолатда ушлаб туриш, таҳдидларга нисбатан биргаликда ҳаракат схемаларини шакллантириш ҳақида ҳам келишувлар муҳокама этилди.
Қисқаси, Вашингтон вакили ташрифи минтақада чегаралар бўйича вазиятни юмшатиш, хавфсизлик соҳасида янги архитектура асосларини шакллантириш ва йирик келишувларга қадам ташлашга йўналтирилгани кўрсатди. Бироқ келишувларнинг тақдири расмий музокара жараёнлари ва манфаатдор томонларнинг сиёсий иродасига боғлиқ бўлиб қолмоқда.
«Замин»ни Telegram’да ўқинг!
