Украина ва Россия ўртасидаги мураккаб вазият АҚШ президенти Доналд Трампнинг яқиндаги баёнотидан кейин янада ўткир тус олди. Сиёсий майдондаги бу сўзлар кескинликнинг янги босқичини бошлаб берди ва халқаро ҳамжамият диққат марказига айланди.
Эслатиб ўтамиз, Трамп Truth Social ижтимоий тармоғидаги чиқишида ўзидан аввалги президент Жо Байденни Украина масаласида ортиқча эҳтиёткорликда айблади. Унга кўра, Байден “Украинага Россияга қарши ҳужум уюштиришга йўл қўймаган” ва бу билан жангда устунликка эришиш имкониятини чеклаган.
Трамп эса ўз сўзида: “Ҳужумчига қарши зарба бермасдан туриб, можарода ғалаба қозонишнинг иложи йўқ”, дея қатъий баёнот берди. Бу эса Киевда Россия ҳудудига зарба беришга де-факто рухсат сифатида қабул қилинди.
Кремлда эса бу гаплар қаттиқ норозилик ва ғазаб уйғотди. INSIDER-T тарқатган маълумотга кўра, “Трампнинг баёноти Киевга узоқ масофали қуроллардан фойдаланиш учун сигнал сифатида қабул қилинди ва Кремл бу ҳолатдан жуда ғазабланди”.
Россия раҳбариятининг мулоҳазаларига кўра, бу ҳолат нафақат Москва ва Вашингтон ўртасидаги олдинги келишувларни қайта кўриб чиқишга олиб келиши мумкин, балки Россия пойтахти учун тўғридан-тўғри хавф ҳам яратиши эҳтимолдан холи эмас.
Манбалар таъкидлашича, вазият шу қадар таранглашдики, Россия президентининг ёрдамчиси Юрий Ушаков фавқулодда тарзда Трамп атрофидаги шахслар билан мулоқотга киришган. Хусусан, у АҚШ етакчисининг маслаҳатчиси Стив Уиткофф билан боғланиб, унга “президентингиз билан мулоҳаза юритинг, кескинликни чекланг”, дея таклиф қилган.
Шу тариқа, Трампнинг қатъий сўзлари Украина учун қўшимча имконият сифатида кўрилса, Россия учун янги таҳдид ва сиёсий хавотир уйғотувчи омилга айланди. Муттахассислар эса келгуси кунларда можаро янада кучайиши мумкинлигини истисно этмаяпти.
«Замин»ни Telegram’да ўқинг!
