1 сентябрдан эътиборан дорихона ходимлари харидорларга мавжуд арзонроқ муқобил дорилар ҳақида хабар бермаган тақдирда, катта миқдорда жаримага тортилиши мумкин. Бу ҳақида Москва давлат юридик университети доценти Алексей Кубишкин маълум қилди, деб ёзади Pravilamag.
Унинг таъкидлашича, янги тартиб Россия Соғлиқни сақлаш вазирлиги тасдиқлаган ва 1 сентябрдан кучга кирадиган “Тиббиётда яхши дорихона амалиёти қоидалари”га киритилган ўзгартиришлар билан боғлиқ.
Амалдаги қонун дорихона мутахассислари ва раҳбарларини арзонроқ препаратлар борлиги ҳақида маълумотни яширмасликка мажбур қилган эди. Лекин талаблар аниқ белгилаб берилмаганлиги сабабли, эндиликда бундай ҳолатга йўл қўйилса, санкциялар қўлланади.
Қоидага амал қилмаган ходимлар 100 мингдан 200 минг рублгача жаримага тортилиши мумкин. Бу эса лицензиялаш шартларини қўпол равишда бузиш сифатида баҳоланади, дея қўшимча қилди Кубишкин.
Аввалроқ фармацевтларга дори танлашдаги нотўғри ёндашув учун жавобгарлик жорий этиш таклиф қилинган эди. Тадқиқотлар эса 60 фоиз ҳолларда дорихона ходимлари айнан маркетинг келишуви мавжуд бўлган препаратни харидорга тавсия қилишини кўрсатган.
«Замин»ни Telegram’да ўқинг!
