Dpa тарқатган хабарларга кўра, ҲАМАС қўлида қолган исроиллик асирларнинг яқинлари Исроил ҳукуматининг олти аъзоси – жумладан, мудофаа вазири Исраэл Кац ва ташқи ишлар вазири Гидеон Саар уйлари олдида норозилик акцияси ўтказишди.
Намойишчилар вазирлардан Ғазо секторида тўқнашувларни тўхтатиш тартибини жорий этиш ва асирликдагиларни озод қилиш учун ҲАМАС билан келишувга эришишни талаб қилишди. «Биз бошқа кечикишларни қабул қилмаймиз», — дейилади уларнинг баёнотида. «Халқнинг овозини эшитинг: бу урушни тўхтатинг ва барчани уйига қайтаринг».
18 август куни AFP ўз манбаларига асосланиб, ҲАМАС Ғазода отишмаларни тўхтатишга оид янги таклифни ҳеч қандай ўзгартиришсиз қабул қилганини хабар қилди. Манбалардан бирига кўра, келишув 60 кунлик оташкесимни ва асирликдагиларни икки босқичда озод қилишни ўз ичига олган.
Шу билан бирга, маълумотларга кўра, гаровдаги 50 исроилликдан фақат 20 нафари тирик қолган бўлиши мумкин. Исроил раҳбарияти эса ҳозиргача оташкесим таклифига розилигини расман тасдиқлагани йўқ.
Шу тариқа, Исроил жамоатчилигида ҳукуматга бўлган босим ортиб бормоқда. Экспертлар ва кузатувчилар эса бу жараёнда сиёсий қарор қанчалик тез қабул қилиниши, гаровдагилар тақдири қандай ҳал этилиши билан қизиқмоқда.
«Замин»ни Telegram’да ўқинг!
