Россия ва Украина ўртасида давом этаётган тўқнашувда янги бурилиш эҳтимоли пайдо бўлди. АҚШ президентининг махсус вакили Стив Уиткофф Fox News телеканалига берган суҳбатида Москва Киевга Донецк вилояти орқали ўт очишни тўхтатиш таклифи билан чиққанини маълум қилди.
Унинг айтишича, бу таклиф тарихий аҳамият касб этади, аммо Украина учун жуда оғир қарор бўлиши мумкин. «Россияликлар тинчлик келишувини столга қўйди. Унда Донецк (Украинанинг Донецк вилояти) масаласи бор. Бу украиналиклар учун қабул қилиб бўлмасдек кўриниши мумкин. Лекин ҳеч ким ҳалигача бундай ўзгаришга эришмаган. Бу эса (АҚШ президенти Доналд Трампнинг) шахсий кучли характери ва можарони тугатиш, инсонлар ўлимига барҳам бериш йўлидаги кучли мотивациясини кўрсатади. Биз урушнинг охирига яқинлашяпмиз, деб ҳисоблаймиз», – деди Уиткофф.
Шунингдек, у ўз баёнотида бу ҳафта Ню-Йорк шаҳрида Украина вакиллари билан учрашишни режалаштираётганини таъкидлади. «Украиналиклар билан музокаралар бўлади. Мен улар билан Ню-Йоркда учрашаман. Бу муҳим сигнал ҳисобланади. Ҳар куни Россия билан ҳам алоқада турибмиз. Ўйлайманки, бу жараён (Россия ва Украина президентлари) ўртасида икки томонлама учрашув билан якунланиши мумкин», – дея қўшимча қилди АҚШ вакили.
Шундай қилиб, можаро тақдирини ҳал қилиши мумкин бўлган навбатдаги қадамлар қўйилмоқда. Агар таклиф амалда иш берса, бу тинчлик йўлидаги энг катта дипломатик ютуқлардан бири сифатида тарихга кириши мумкин. Украина эса ушбу таклифга қандай муносабат билдириши жаҳон сиёсий саҳнасини диққат билан ўйлантирмоқда.
«Замин»ни Telegram’да ўқинг!
