Россия президенти Владимир Путиннинг Хитойга амалга оширадиган навбатдаги ташрифи халқаро сиёсатнинг диққат марказига айланди. The Guardian таъкидлаганидек, ушбу сафар Вашингтоннинг жанговар ҳаракатларни тўхтатишга қаратилган ҳаракатлари ортида Москва ва Пекиннинг Украинадаги можаро юзасидан позицияларини уйғунлаштиришга қаратилади.
Маълумотларга кўра, Путин ҳафталик ташрифи доирасида Шанхай ҳамкорлик ташкилоти саммитида қатнашади, Си Цзиньпин билан муҳим музокаралар олиб боради ва Пекинда Япониянинг Иккинчи жаҳон урушидаги мағлубиятининг 80 йиллигига бағишланган ҳарбий парадда иштирок этади. Бу тантанали маросимда Путин КХДР етакчиси Ким Чен Ин, шунингдек Эрон ва Куба президентлари билан бир қаторда асосий меҳмон сифатида қатнашиши кутилмоқда.
Сиёсий таҳлилчилар фикрича, Путин ва Си учрашувининг марказий мавзуси айнан Украина бўйича умумий позицияни белгилаб олишдан иборат бўлади. Кремль Пекиндан кейинги босқичдаги ёрдамга ишонаётгани айтилади. Шу билан бирга, агар АҚШ Москвадан жанговар ҳаракатларни тўхтатишни талаб қилса, Хитойнинг муносабати қандай бўлиши масаласи ҳам муҳокама марказида бўлади.
Хитой уруш даврида Россиянинг иқтисодий таянчига айланди. Шу боис икки давлат раҳбарлари иқтисодий ҳамкорлик масалаларини ҳам кенг кўламда кўриб чиқиши кутилмоқда. Хусусан, узоқ йиллардан бери муҳокама қилинаётган «Сила Сибири-2» газ қувури лойиҳаси, шунингдек, нефть алоқаларини кенгайтириш режалари музокара кун тартибига киритилади.
Журналистлар тахмин қилишича, учрашув ҳарбий соҳадаги ҳамкорликка ҳам таъсир кўрсатиши мумкин. Хитой расмий равишда Россияга тўғридан-тўғри ҳарбий ёрдам кўрсатмаётганини айтса-да, АҚШ манбалари Пекин Россияга ҳарбий саноатни қайта тиклаш учун зарур бўлган ускуналарнинг тахминан 70 фоизини ва яримўтказгичларнинг 90 фоизини етказиб берганини маълум қилган. Эвазига Хитой Россиядан юқори технологияли мудофаа ишланмалари бўйича маълумотлар олмоқда, деган фикрлар ҳам мавжуд.
Ташриф рамзий жиҳатдан ҳам катта аҳамият касб этади. 3 сентябр куни Пекиндаги ҳарбий парадда Путин Си Цзиньпин билан елкама-елка ўтириши кутилмоқда. Бу 9 май куни Москвада бўлиб ўтган Ғалаба парадининг ўзига хос аксидир, ўшанда Хитой етакчиси фахрий меҳмон сифатида Қизил майдондан россиялик ҳарбийлар билан бирга ўтган эди.
Шу тариқа, Путиннинг бу ташрифи нафақат сиёсий, балки иқтисодий ва ҳарбий соҳаларда ҳам Россия–Хитой муносабатларини янги босқичга кўтариши мумкин. Музокараларда қабул қилинадиган қарорлар Украинадаги урушнинг кейинги йўналишига жиддий таъсир кўрсатиши эҳтимолдан холи эмас.
«Замин»ни Telegram’да ўқинг!
