Украина аҳолиси орасида олиб борилган сўнгги ижтимоий сўров натижалари катта қизиқиш уйғотди. «Рейтинг» (Rating Group) Украина социологик маркази 31 август, якшанба куни эълон қилган маълумотларга кўра, украиналикларнинг ярмидан кўп қисми — аниқроғи, 59 фоизи — Россия билан олиб борилаётган урушни тўхтатиш ва Москва раҳбарияти билан муроса топиш тарафдори эканини билдирган.
Сўровдан маълум бўлишича, жамоатчиликнинг бир қисми ҳали ҳам кескинроқ позицияда қолмоқда. Хусусан, респондентларнинг 20 фоизи 2014 йилда Россия томонидан эгаллаб олинган Донбасс ва аннексия қилинган Қрим Украина таркибига қайтарилгунига қадар ҳарбий ҳаракатлар давом этишини қўллаб-қувватламоқда.
Шу билан бирга, сўралганларнинг 13 фоизи 2022 йил 23 феврал ҳолатидаги демаркация чизиғи ёки янги чегара ўрнатиш вариантини маъқул кўрган. Бу эса, айни пайтда жамият ичида турли йўллар орқали тинчликка эришиш ҳақида фикрлар хилма-хиллигини кўрсатмоқда.
Музокаралар масаласида эса рақамлар янада аниқроқ. Респондентларнинг 82 фоизи Россия билан музокараларни урушни тугатишнинг ҳақиқий йўли сифатида баҳолаган. Уларнинг 62 фоизи учинчи давлатлар иштирокида муроса топиш тарафдори бўлса, қолган 20 фоизи Киев ва Москва ўртасида тўғридан тўғри мулоқот ўтказилиши лозим, деган фикрни билдирган.
Мутахассислар таъкидлашича, ушбу кўрсаткичлар Украина жамиятининг катта қисми урушдан чарчагани ва тинчлик йўлида янги сиёсий форматларга тайёрлигини кўрсатади. Шу билан бирга, ҳудудий масала атрофидаги кескин қарашлар ҳали ҳам мавжудлигича қолмоқда.
Заҳмат ва талофатлардан чарчаган халқнинг муроса истаги мамлакат келажагида ҳал қилувчи рол ўйнаши мумкинлиги эътироф этилмоқда. Шу сабабли, экспертлар Украина ва Россия ўртасидаги тинчлик музокаралари масаласи жаҳон сиёсатининг энг долзарб мавзуларидан бири сифатида кун тартибидан тушмаслигини таъкидлашмоқда.
«Замин»ни Telegram’да ўқинг!
