Россия президенти Владимир Путин Хитойга ташрифини якунлаб ўтказган матбуот анжуманида Украина раҳбари Володимир Зеленскийга қарата янги чақириқ билан чиқди. Унинг сўзларига кўра, агар Зеленский тайёр бўлса, Москвага келиб учрашиши мумкин. Бироқ Путин бундай учрашувнинг маъноси бор-йўқлигини ҳали ҳам аниқ билмаслигини таъкидлади ва яна Зеленский президентлигининг қонунийлигини шубҳа остига олди.
Эслатиб ўтамиз, бу ғоя аввалроқ Доналд Трамп билан суҳбатда ҳам тилга олинганди. Аммо Зеленский “Фақат Москвада эмас” дея жавоб қайтарган ва Путиннинг таклифини рад этган эди.
Россия раҳбари Зеленский билан учрашишдан бир неча бор бош тортган, чунки уни “ноқонуний президент” сифатида баҳолаган. Путиннинг фикрича, Украинада янги сайлов ўтказилмагани сабаб Зеленскийнинг легитимлиги савол остида қолмоқда. Аммо Украина қонунчилигига кўра, президентлик сайлови фақат ҳарбий ҳолат якунланганидан 90 кун ўтгач ташкил этилиши мумкин.
Путин нутқидан муҳим иқтибослар
– «Россия ҳеч қачон Украина хавфсизлиги кафолатларини ҳудудлар эвазига муҳокама қилмаган. Киев ўз хавфсизлик тизимини ўзи танлаш ҳуқуқига эга, аммо бу иш Россия ҳисобидан бўлмаслиги шарт».
– «Биз ҳеч қачон ер учун эмас, балки одамларнинг ўз тилида сўзлашиш ва ўз маданиятида эркин яшаш ҳуқуқи учун курашмоқдамиз. Россия таркибида қолишни танлаган халқ иродасини эътиборга олиш керак, бу – демократиянинг асоси».
– «Агар Украина ҳукумати ҳудудий масалаларни ҳал қилишни хоҳласа, аввало ҳарбий ҳолатни бекор қилиб, референдум ўтказиши шарт».
– «Агар соғлом фикр устун келса, можарони тинч йўл билан ҳал этиш бўйича келишувга эришиш мумкин. Ҳозир АҚШ маъмуриятининг кайфияти ҳам шунга йўналганини кўряпмиз. Умид бор, туннел охирида ёруғлик бор. Лекин агар бу йўл танланмаса, ҳаммасини қуролли йўл билан ҳал қилишга тўғри келади».
Хулоса
Путиннинг сўзлари яна бир бор Россия ва Украина ўртасидаги мураккаб сиёсий вазият қандай ёрқин қарама-қаршиликлардан иборат эканини кўрсатди. У бир тарафдан музокараларга очиқ эканини айтса, иккинчи тарафдан Зеленскийнинг қонунийлигига шубҳа қилади.
«Замин»ни Telegram’да ўқинг!
