Франция пойтахти Парижда 4 сентябр куни ўтказилган «кўнгиллилар коалицияси» йиғилиши ортидан Украина президенти Володимир Зеленский муҳим баёнот билан чиқди. Унинг сўзларига кўра, йиғилиш иштирокчилари Украина хавфсизлиги учун умумий кафолатлар тўплами бўйича келишиб олди ва бу жараёнда энг катта масъулият Украина Қуролли кучлари зиммасига юкланиши алоҳида таъкидланди.
Зеленскийнинг сўзларига кўра, барча қатнашчилар Москва томонидан Украинага қарши бошланган урушига барҳам беришга қаратилган тинчлик ташаббусларини ҳозирги пайтда қабул қилиш мумкин эмаслигини якдил равишда қайд этишган. Бу, ўз навбатида, Киевнинг позицияси халқаро миқёсда тўлиқ қўллаб-қувватланаётганидан далолат бермоқда.
Франция раҳбари Эммануэл Макрон ҳам йиғилиш якунида сўзга чиқиб, 26 давлат Украина ҳудудида ўт очишни тўхтатиш жараёни амалга оширилгандан сўнг тинчликпарварлик миссиясида иштирок этиш ниятида эканини маълум қилди. Унинг айтишича, мазкур давлатлар «ё Украинага ўз контингентини юборишга, ёки денгиз ва ҳаво ҳудудида хавфсизликни таъминлаш учун аниқ ресурслар ажратишга тайёр».
Шунингдек, Макрон АҚШнинг Украина хавфсизлигига оид кафолатларини қўллаб-қувватлаш масаласи яқин кунларда маълум бўлишини билдирди. Унга кўра, келгусида Киев Россияга қарши санкциялар борасида Вашингтон билан бевосита мувофиқлашув олиб боради.
Париждаги саммитда жами 35 давлат ва ҳукумат раҳбарлари иштирок этди. Йиғилиш халқаро ҳамжамиятнинг Украина хавфсизлиги ва мустақиллигини таъминлашда бир овоздан ҳаракат қилишга тайёр эканини яна бир бор намоён қилди.
