Европанинг йирик давлатлари раҳбарлари Украина президенти Володимир Зеленский билан ўтказилган учрашувда Россия томонидан янги ҳужум эҳтимоли ҳақида жиддий хавотир билдирди. Bloomberg агентлиги тарқатган маълумотларга кўра, ўтган ҳафта Франциянинг Тулон шаҳрида бўлиб ўтган Хавфсизлик кенгаши йиғилишида Германия ва Франция расмийлари Донецк вилояти шарқидаги Покровск яқинида рус қўшинлари тўпланаётгани масаласини атрофлича муҳокама қилган.
Зеленскийнинг ўзи ҳам бир неча кун олдин Россия 100 мингга яқин ҳарбий кучини Покровск ташқарисидаги фронт йўналишига йўналтирганини айтиб ўтганди. Манбаларга кўра, Москва қўшинлари бир йилдан зиёд вақтдан буён ушбу шаҳарни қамал қилишга ва назоратни қўлга олишга ҳаракат қилиб келмоқда. «Покровскнинг эгалланиши Россия учун Краматорск ҳамда Славянск каби йирик марказларга йўл очиши мумкин. Бу эса Кремлнинг бутун Донецк вилояти устидан тўлиқ ҳукмронлик ўрнатиш мақсади билан узвий боғлиқ», — дея таъкидлайди Bloomberg.
Мақолада қайд этилишича, Россиянинг ёзда амалга оширган оғир ва куч сарфланган ҳужумлари Кремл кутган даражада катта натижа бермади. Ҳозирга қадар Москва қўшинлари секинлик билан олға силжиб, май ва август ойлари орасида бор-йўғи 2033 квадрат километр ҳудудни эгаллай олган. Бу Украина умумий майдонининг атиги 0,3 фоизини ташкил этади.
Шу тариқа, Европа етакчилари Киев билан хавфсизлик кафолатлари юзасидан фикр алмашар экан, фронтдаги воқеалар ҳолати ва Россиянинг эҳтимолий қадамлари уларнинг асосий ташвишига айланиб қолди.
«Замин»ни Telegram’да ўқинг!
