Арманистон президенти Ваагн Хачатуряннинг таъкидлашича, бугунги кунда Россия ва Арманистон ўртасидаги муносабатлар илгаригидек "ака-ука" даражасида эмас, балки тенг ҳуқуқли ҳамкорлик асосида ривожланмоқда.
"Ҳозирги пайтда Россия билан алоқаларимиз тамоман бошқача кўринишда – бу тўғридан-тўғри ҳамкорлик муносабати. Россия энди Арманистонга ака-ука сифатида эмас, балки шерик сифатида қараяпти. Сўнгги тўрт йил давомида биз катта ютуқларга эришдик", – дея таъкидлади Хачатурян.
Президентнинг фикрича, Ереван Россиянинг Арманистон ҳукумати томонидан қабул қилинадиган мустақил қарорларини тўлиқ инобатга олишини истайди.
Шунингдек, у Россия бош вазири ўринбосари Алексей Оверчукнинг Арманистон Евросиё иқтисодий иттифоқи (ЕОИИ) ёки Евроиттифоқдан бирини танлаши кераклиги ҳақидаги баёнотига ҳам муносабат билдирди.
"Бу сўзлар нима англатишини ўзидан сўраш керак. Биз ЕОИИ доирасида белгиланган шартлар асосида ишлаяпмиз. Шу билан бирга, Евроиттифоқ билан иқтисодий мазмундаги келишувлар устида ҳам иш олиб боряпмиз. Ҳозиргача бу йўналишларда ҳеч қандай муаммолар юзага келмади", – деди Арманистон раҳбари.
Ҳозирги баёнотлардан англашилишича, Ереван ташқи сиёсатда мустақил йўналишини сақлаб қолиш ва Россия ҳамда Европа билан ҳам иқтисодий муносабатларни мувозанатли равишда ривожлантиришдан манфаатдор.
«Замин»ни Telegram’да ўқинг!
