АҚШ президенти Доналд Трамп ўзининг Truth Social ижтимоий тармоғида Россияга қарши янги ва қаттиқ санкциялар ҳақида баёнот берди. Унинг таъкидлашича, бундай чекловлар фақат НАТОга аъзо барча давлатлар розилигида амалга оширилиши мумкин. Шу билан бирга, Россия нефтини сотиб олишдан тўлиқ воз кечиш зарурлигига урғу берди.
Трампнинг фикрича, айни пайтдаги вазиятда Россиядан нефть сотиб олиш Шимолий Атлантика иттифоқининг Россия-Украина можаросини ҳал қилишдаги позициясини кучсизлантирмоқда. Шу сабабли, у барча аъзо давлатларни бу масалада қатъий позиция эгаллашга чақирди.
Президент шунингдек, Хитойдан келадиган маҳсулотларга юксак божларни жорий этиш орқали урушнинг қисқа муддат ичида якунланиши мумкинлигини таъкидлади. Унинг сўзларига кўра, агар НАТО биргаликда Хитой товарларига 50 фоиздан 100 фоизгача бўлган бож тўловларини киритса, бу урушни тўхтатишда ҳал қилувчи омил бўлади.
«Агар шундай чоралар кўрилса, уруш тез орада тугайди ва минглаб инсонларнинг ҳаёти сақланиб қолади. Акс ҳолда, менинг вақтим, шунингдек, Америка Қўшма Штатларининг вақти, энергияси ва маблағлари беҳуда сарфланади», — деб ёзди Доналд Трамп.
Шу билан бирга, у божлар Россия ва Украина ўртасидаги тўқнашув тугагач, тўлиқ бекор қилиниши мумкинлигини ҳам қўшимча қилди. Трампнинг баёноти халқаро майдонда катта қизиқиш уйғотди ва унинг ғоялари жамоатчилик орасида кенг муҳокама этилмоқда.
