Полшaнинг нуфузли нашри Rzeczpospolita тарқатган маълумотга кўра, мамлакат шарқида жойлашган Вирики-Вола қишлоғида рус дронларининг ҳаво ҳудудига кириши вақтида зарар кўрган уйга учувчисиз аппарат қолдиқлари эмас, балки Полшага тегишли F-16 қирувчи самолётидан отилган «ҳаво-ҳаво» туридаги ракета тушган. Манбанинг таъкидлашича, парвоз пайтида ракета йўналтириш тизимида техник носозлик содир бўлган ва қурилма тўғри ишламай қолган. Бу ҳақда хавфсизликка масъул давлат идораларидаги манба газетага берган интервьюсида маълум қилди.
Люблин прокуратураси эса ҳодиса юзасидан очиқ маълумот тарқатмасдан, қулаган қурилмани «номаълум учувчи объект» сифатида аташ билан чекланди. Бироқ газета хабарида қайд этилишича, прокуратура қўлида воқеа ҳақида тўлиқ маълумот мавжуд. Мутахассислар ёрдамида 17 та дроннинг қолдиқлари осонгина аниқланган, аммо айнан Вирики ҳудудига тушган объект ҳақида расмий изоҳ беришдан бош тортилган. Прокуратура баёнотида: «Айни вақтда мазкур қурилма на дрон ва на унинг бўлаклари сифатида тасдиқланган», — дейилади.
Газетага жавобан идора матбуот котиби Агнешка Кемпка тергов ҳали давом этаётгани, аниқ хулосалар учун махсус экспертларнинг расмий ҳисоботи кутилганини таъкидлади. Шу билан бирга, Rzeczpospolita манбасига кўра, оғирлиги 150 килограммдан зиёд, узунлиги уч метрга етган AIM-120 AMRAAM туркумига оид ракета уйга қулаган. Аммо қурилманинг портловчи қисми фаоллашмаган, чунки хавфсизлик тизимлари ишга тушган. Шу боис уйга етказилган зарар катта бўлса-да, кучли портлаш содир бўлмаган.
Бу ҳолат Полша жамоатчилигида жиддий баҳсларга сабаб бўлди. Чунки ҳодиса Россия дронларининг ҳаво ҳудудини бузиши ортидан юз берган ва айни пайтда НАТО хаво ҳимоя тизимининг самарадорлиги ҳақида саволлар туғдирган. Эҳтимол, келгусида ушбу воқеа Полшадаги хавфсизлик чораларини янада кучайтиришга сабаб бўлиши мумкин.
«Замин»ни Telegram’да ўқинг!
