Америка Қўшма Штатлари президенти Доналд Трамп келаси ҳафтада Нью-Йорк шаҳрида Украина раҳбари Володимир Зеленский билан учрашиш эҳтимоли борлиги ҳақида маълум қилинди. Бу ҳақда Тел-Авивда АҚШ давлат котиби Марко Рубио матбуотга айтиб ўтди.
Маълумки, 22–30 сентябрь кунлари БМТ Бош ассамблеясининг 80-сессияси доирасида юқори даражали йиғилишлар ҳафталиги ўтказилади. Дунё мамлакатлари етакчилари иштирок этадиган ушбу анжуман доирасида турли учрашувлар ва мулоқотлар режалаштирилган.
Марко Рубионинг таъкидлашича, Доналд Трамп Украинада давом этаётган урушни тўхтатиш учун бор имкониятларини ишга солишга ҳаракат қилмоқда. «У бу можарони бартараф этиш йўлида қўлидан келган ҳамма нарсани қилаяпти», — деди давлат котиби.
Шунингдек, Рубио Трампнинг Россия президенти Владимир Путин билан бир неча марта телефон орқали гаплашганини ва Украина етакчиси Зеленский билан бир неча бор юзма-юз учрашганини эслаб ўтди. «Эҳтимол, келаси ҳафтада Нью-Йоркда яна бир учрашув ҳам амалга ошади», — дея қўшимча қилди АҚШ дипломатияси раҳбари.
Шу билан бирга, Украина тарафи ҳозирча Трамп ва Зеленскийнинг янги учрашувини ўтказиш имкониятини расман тасдиқлагани йўқ. Бу эса халқаро сиёсий майдонда қизиқиш ва саволларни янада кўпайтирмоқда.
