АҚШ президенти Доналд Трамп 18 сентябрь куни қилган чиқишида Украинадаги можарони ечиш масаласи унинг ўйлаганидан кўра мураккаб кечаётганини таъкидлади. Унинг сўзларига кўра, Россия раҳбари Владимир Путин билан шахсий муносабатлари сабаб урушни осонроқ ҳал қилиш мумкин, деб ҳисоблаган, бироқ воқелик умидларини оқламаган. Бу ҳақда Sky News манбаси маълум қилди.
«Мен Путин билан муносабатларим туфайли Россия ва Украина ўртасидаги тўқнашувни тезроқ тўхтатиш мумкин, деб ўйлагандим. Аммо у мени чўчитди, ҳақиқатан ҳам чўчитди», — деди Трамп Буюк Британия бош вазири Кир Стармер билан қўшма матбуот анжуманида.
Шу билан бирга, Америка раҳбари Россиянинг Украинага нисбатан кўпроқ йўқотишларга учраётганини ҳам қайд этди. «Путин кўплаб одамларни ўлдирмоқда. Аммо ўлдиришдан ҳам кўпроқ аскарларини йўқотяпти. Россия армияси Украинага қараганда каттароқ йўқотишларга дуч келмоқда», — дея таъкидлади у.
Трампнинг фикрича, агар АҚШ президенти сифатида Байден эмас, ўзи фаолият юритганида, Украинадаги кенг кўламли уруш ҳеч қачон бошланмас эди. У бу нуқтаи назарини яна бир бор такрорлаб, Оқ уйда кўп маротаба айтиб келганини эслатди.
«Бу урушда миллионлаб одамлар ҳалок бўлмоқда. Улар америкалик аскарлар эмас, лекин қурбонлар сони Иккинчи жаҳон урушидаги тезлик билан ўсмоқда. Шу сабабли мен бу муаммони ҳал қилишга мажбурман, деб ҳисоблайман», — деди АҚШ президенти.
Sky News қайд этганидек, Трамп яна бир бор Украина раҳбари Володимир Зеленскийга Овал кабинетда айтган сўзини такрорлади: агар можаро давом этса, у бутунлай Учинчи жаҳон урушига айланиб кетиши мумкин.
«Замин»ни Telegram’да ўқинг!
