Россия президенти матбуот котиби Дмитрий Песков АҚШ президенти Доналд Трампнинг Украина можароси ҳақидаги сўзларига изоҳ берди. Унинг таъкидлашича, Вашингтон раҳбарининг бу мавзуга эмоционал ёндашиши табиий ҳолат, чунки у урушни тўхтатишга ҳаракат қилмоқда.
Журналистлар Песковдан Владимир Путиннинг Трамп томонидан айтилган «панд берди» деган айбловига муносабатини сўрашди. Кремль вакили бунга жавобан:
— Биз Америка Қўшма Штатлари ва шахсан президент Трамп ўз сиёсий иродасини сақлаб қолишига ишонамиз. У бу мавзуда жуда ҳиссий ёндашмоқда ва бу мутлақо тушунарли ҳолат, — деди.
Шу билан бирга, Песков Владимир Путиннинг Украинадаги можарони фақат дипломатик йўл билан ҳал қилиш тарафдори эканини таъкидлади. Унинг фикрича, Кремль бу йўналишда кўп ишларни амалга оширмоқда. Бироқ, Москва тарафидан билдирилишича, “Киев режими ва айрим Европа давлатлари қаршилик йўлини танлаб, жараённи чўзмоқда”.
Эслатиб ўтамиз, Доналд Трамп 18 сентябрь куни қилган чиқишида Путин билан муносабатлари туфайли Россия ва Украина ўртасидаги урушни осонроқ ҳал қилиш мумкинлигини ўйлаганини, аммо “россиялик ҳамкасби унга панд берганини” айтган эди.
Песковнинг баёноти шундан далолат берадики, Москва Вашингтон билан мулоқот имкониятларини ёпмаган. Шу билан бирга, Украина атрофидаги вазият ҳали ҳам Ғарб ва Россия ўртасидаги жиддий келишмовчилик нуқтаси бўлиб қолмоқда.
«Замин»ни Telegram’да ўқинг!
