13 ёшли афғон бола KAM Air авиакомпанияси самолётининг шассисига яширинган ҳолда, Афғонистоннинг Кобул шаҳридан Деҳлига учиб борди. Бу воқеа The Independent газетасида хабар қилинди.
Афғонистоннинг Қундуз шаҳрида яшовчи ўсмир самолёт Деҳлидаги Индира Ганди халқаро аэропортига қўнганидан сўнг, икки соатлик парвоздан кейин топилган. Расмийларга кўра, бола Кобул аэропортининг чекланган ҳудудига кириб, KAM Air самолёти шассисининг орқа бўлинмасига яширинишга муваффақ бўлган. Қўнишдан сўнг, авиакомпания ходимлари уни самолёт ёнида топиб, аэропорт хавфсизлик хизматига хабар берган.
Дастлабки суриштирувда бола, самолётга қизиқиш туфайли, хавф-хатарни англамаган ҳолда кирганини айтиб ўтган. Ўсмир Деҳлидан кейин бошқа самолётда Афғонистонга қайтарилган.
Самолёт шассисида омон қолиш ҳолатлари кам учрайди. Чиптасиз йўловчиларнинг аксарияти гипоксия, гипотермия ёки шасси механизмларидан олинган жароҳатлар туфайли ҳалок бўлади. Авиация эксперти Мохан Ранганатхан сўзларига кўра, ўсмир «эҳтимол, зич ёпиқ жойга кириб олган, у герметизация қилинган ва унда йўловчилар салонидаги ҳароратга яқин ҳарорат сақланган бўлиши мумкин».
Ранганатхан бундай шароитларсиз тахминан 10 км баландликда омон қолишнинг имконсизлигини тушунтирди. Чунки бу баландликда кислороднинг паст даражаси тезда ҳушдан кетиш ва ўлимга олиб келиши мумкин. -40°C дан -60°C гача бўлган ҳарорат бир дақиқадан камроқ вақт ичида совуқ қотишга, кейин эса гипотермияга олиб келади.
1947 йилдан 2020 йилгача бўлган даврда АҚШ Федерал фуқаро авиацияси бошқармаси томонидан кўриб чиқилган самолёт шассисидаги 128 та чиптасиз саёҳат ҳолатларининг 75 фоиздан ортиғи оғир шароит туфайли ўлим билан якунланган.
«Замин»ни Telegram’да ўқинг!
