Калифорнияда юз берган ноодатий ҳодиса бутун жамоатчиликда катта муҳокамаларга сабаб бўлди. Содир этмаган жинояти учун 38 йил умрини темир панжаралар ортида ўтказган Морис Ҳастингсга давлат томонидан 25 миллион доллар миқдорида товон пули тўланди. The Guardian ёзганидек, бу Калифорния тарихида ноқонуний ҳукм учун амалга оширилган энг катта миқдордаги тўловдир.
Ҳастингс узоқ йиллар давомида айбсизлигини исботлаш учун адолат излаб юрди. У 1983 йилда Роберта Уайдермайер номли аёлни ўлдиришда айбдор деб топилиб қамоққа ҳукм қилинган эди. Бироқ 2022 йилда ўтказилган ДНК экспертизаси унинг мутлақо айбсиз эканини кўрсатди. Аслида жиноят жойида қолган излар бошқа шахсга тегишли бўлиб чиқди.
Маълум бўлишича, ДНК далили Роберта Уайдермайер ўлимидан кўп ўтмай ҳибсга олинган ва кейинчалик бир қатор жиноятлар учун қамалган Кеннет Пакнеттга тегишли бўлган. Унинг қўлидан марҳуманинг ашёлари ҳам топилган, бироқ ўша вақтда полиция ва прокуратура бу изларни эътиборсиз қолдириб, айбни Ҳастингс зиммасига юклаган. Пакнетт 2020 йилда қамоқхонада вафот этган.
Фақат 2000 йилда Ҳастингс талаб қилган ДНК текшируви орадан 21 йил ўтиб амалга оширилди ва натижалар ҳақиқий қотилни кўрсатди. 2023 йилда суд расман уни айбсиз деб топди.
— «Мендан ўғирланган 38 йил умрни ҳеч қандай пул қайтара олмайди», — деди 72 ёшли Ҳастингс суд қароридан кейинги интервюсида.
Унинг адвокати Ник Брастин эса, бу воқеа бутун мамлакат ҳуқуқ-тартибот органлари учун сабоқ ва огоҳлик сифатида хизмат қилиши зарурлигини таъкидлади.
Шу тариқа, бир инсоннинг айбсизлик учун олиб борган кўп йиллик кураши нафақат шахсий адолатни тиклади, балки тизимдаги катта хатоларни ҳам кўрсатиб берди.
«Замин»ни Telegram’да ўқинг!
