Кремльнинг расмий нуқтаи назарича, АҚШ президенти Доналд Трампнинг Украина ҳудудларини қайтариб олиш имконияти ҳақидаги гаплари бевосита Киев раҳбари Володимир Зеленскийнинг таъсири остида билдирилган. Россия президенти матбуот котиби Дмитрий Песков айниқса Трампнинг Россияни «қоғоздаги йўлбарс»га қиёслаган фикрини рад этиб, бу ўхшатишга кескин муносабат билдирди.
«Россия йўлбарс эмас, балки айиқ билан яқинроқ боғланган давлат. Қоғоздан ясалган айиқлар эса умуман бўлмайди», – деди Песков 24 сентябр, чоршанба куни берган баёнотида.
Унинг айтишича, Трампнинг сўзлари Зеленский билан учрашувидан кейин янграган ва у асосан украин томони тақдим этган нуқтаи назар таъсирида фикр билдирган. Песковнинг таъкидлашича, бу қарашлар Россиянинг вазиятга нисбатан ўз тушунчаларидан кескин фарқ қилади. Шу билан бирга, Россия ташқи ишлар вазири Сергей Лавров Ню-Йоркдаги БМТ Бош ассамблеяси доирасида «Россиянинг ҳақиқий позициясини Америка делегациясига етказиш» имкониятига эга бўлгани қайд этилди.
Песков Трампнинг Россия «чуқур иқтисодий инқирозда» деган сўзларига ҳам жавоб қайтарди. Унинг таъкидлашича, Россия иқтисодиёти санкцияларга қарамай, «барқарор ва прогнозли ҳолатда» қолмоқда, шунингдек, Украинадаги ҳарбий ҳаракатларда қуролли кучларнинг барча эҳтиёжлари таъминланиши учун зарур чоралар кўрилмоқда.
Песков фикрига кўра, Трампнинг мазкур баёнотлари, аввало, «АҚШнинг бизнес манфаатлари» ҳамда нефть ва газ экспортини кўпайтириш мақсадидан келиб чиққан.
Шу тариқа, Кремль Трампнинг Зеленский таъсиридаги фикрларини ҳақиқатдан йироқ, Россиянинг иқтисодий ва сиёсий қудратини эса барқарор деб баҳолади.
«Замин»ни Telegram’да ўқинг!
