«Ливерпул» бош мураббийи Арне Слот Диогу Жотанинг вафотидан сўнг клуб раҳбариятининг кўрсатган юксак инсоний қадамини эътироф этди. Унинг таъкидлашича, жамоа ҳужумчининг оиласига шартномада кўзда тутилган барча маблағларни тўлиқ тўлаб берди.
Маълумки, португалиялик ҳужумчи Диогу Жота жорий йилнинг 3 июл куни йўл-транспорт ҳодисасида ҳалок бўлган эди. Унинг ўлими бутун футбол оламда катта қайғуга сабаб бўлган, айниқса «мерсисайдликлар»нинг мухлислари унинг хотирасига ҳурмат кўрсатган эди.
Арне Слот ўз фикрларида:
«Аввал ҳам мухлисларимизнинг реакцияси билан фахрланишимни айтгандим. Аммо кўпинча танқид остида қоладиган клуб эгалари бу сафар ҳақиқий инсоний юзини кўрсатди. Жотанинг вафотидан кейин улар хотини ва фарзандларига шартнома бўйича барча маблағларни тўлаб беришди. Бу футбол оламида камдан-кам учрайдиган ҳолат ва алоҳида мақтовга лойиқ», — деб таъкидлади.
Мураббийнинг сўзларига кўра, раҳбариятнинг бу қадами нафақат жамоа, балки бутун футбол жамоатчилиги учун ибрат бўлиб қолади.
«Замин»ни Telegram’да ўқинг!
