Киев Венгрия томонидан Украинага қарши учувчисиз учиш қурилмалари разведка мақсадида ишлатилган бўлиши мумкинлигидан шубҳаланмоқда. Бу ҳақда Украина президенти Володимир Зеленский 26 сентябр куни ҳарбий идоралар раҳбарлари билан ўтказилган йиғилишдан сўнг маълум қилди. Унга тақдим этилган ҳисоботга кўра, мамлакат ғарбида Украина ҳаво ҳудуди бузилгани қайд этилган.
Зеленскийнинг сўзларига кўра, воқеа Украина–Венгрия чегараси яқинида содир бўлган ва ўша ерда ҳаракат қилган дронлар «эҳтимол Венгрияга тегишли» бўлиши мумкин. Унинг айтишича, дастлабки ҳарбий баҳоларга кўра, мазкур учувчисиз қурилмалар Украина чегарадош ҳудудлардаги саноат қувватини кузатиш билан шуғулланган.
Шу билан бирга, Зеленский мавжуд маълумотларни яна бир бор чуқур текшириш ҳақида топшириқ берганини қайд этди.
Эслатиб ўтамиз, шу йил май ойида Украина Хавфсизлик хизмати (СБУ) Венгрия ҳарбий разведкасининг мамлакатдаги жосуслик тармоғи фош этилганини маълум қилганди. Бу ҳолат Киев ва Будапешт ўртасидаги илгаридан мавжуд бўлган кескин муносабатларни янада оғирлаштирган эди.
Венгрия эса Зеленскийнинг айбловларини кескин рад этиб, «у шундай нарсаларни ўйлаб топмоқда» дея баёнот берди. Будапештнинг фикрича, Киевнинг бу каби билдирувлари асоссиз ва вазиятни сунъий тарзда кескинлаштиришга қаратилган.
«Замин»ни Telegram’да ўқинг!
